Ruihhloin a tihbuaite chhanchhuak turin YMA-in ruihhlo a do - CYMA President

Central YMA president Vanlalruata chuan, ruihhlo do chu dan hnuaiah YMA tih tur ni lo mah se, ruihhloin a tihbuaite chhanchhuah an nih theihna atan YMA-in ruihhlo a do tih a sawi.

Nimina Dawrpui Vengthar YMA golden jubilee lawmna a hmanpuinaah thu sawiin CYMA President chuan, tun hnaiah kumtlinglo ruihhlo tih chíng thar an pun thu a sawi a, "Ruihhlo vanga man zingah kumtlinglo an tel ṭhin a, heng mite hian thla 3/4 vel ruihhlo an tih tawh thu an sawi ṭhin. Veng leh khaw tinah ruihhlo ching thar an pung zel a, a do kawngah ṭan lak a ngai hle a ni," a ti.

Vanlalruata chuan, Mizoram chhunga hnam dang awmte an huangtau sâwt hle tih sawiin, "Union territory leh state hial an dil ngam tawh a, Mizote ṭhanharh a hun ta hle. Ṭhalai hnathawk loa awm mai mai an tam ta lutukte hi a veiawm a ni," a ti a; YMA chu mi fel awm khawmna ni bik lo mah se, mi dangte rintlak a nih zel theih nan thianghlim taka awm a pawimawh thu a sawi.

Mizote punna rate hniam lutuk chu veiawm a tih thu sawiin Vanlalruata chuan, "A piang zat aṭanga chhûtin, hmun thuma ṭhena hmun khat vel thi an nih bawk avangin mihring pun kawngah fa nei tam inzirtir uar a ṭul hle. Kan tlem avang hian ram dangin Mizoram min rawn luahpui a, hei hian harsatna a rawn thlen mek a ni," a ti.

CYMA President chuan, Dawrpui Vengthar YMA-in kum 50 tlin an lawm chuan rah ṭha chhuah se a duh thu sawiin, ruihhlo awm lohna leh a ti ṭin awm lohna veng a siam tur leh miretheite'n an chan tur dik tak an hmuh theih nan ṭan la turin a chah.

Jubilee lawmna inkhawm hi Jubilee Organising Committee chairman Vanlalzui-liana'n a kaihruai a, Dawrpui Vengthar YMA president Lalchhuanmawia pawhin thu a sawi.

YMA indoor-a inkhawm buatsaih a nih hma hian jubilee lungphun hawn inkhawm buatsaih a ni a, zanah jubilee mei an dêt a ni. Dawrpui Vengthar Branch YMA hi February 21, 1968-ah din a ni a, member 2,200 vel an awm mek a ni.