Bawngkawn Brigade chhunga mimal In pakhat zirlai nia hriatte'n an tichhia
February 20, Thawhlehni chawhma lamah khan Bawngkawn Brigade venga B Lalhmangaihi, Chaltlang Dingdi Veng in, R Lalhmingliana te chhungkaw luah lai chu zirlai nia hriatte'n an ṭhiat. In ṭhiah tâka cheng chhungkuate hi J Thankima College building-a pindan pakhatah an awmtir rih dawn.
Police hotute aṭanga thu dawn danin, in tihchhiat a nih lai hian a luahtu R Lalhmingliana te chhungkua hi an awm lo a, in tihchhiat a nih bakah in chhunga bungruate pawh a chhe nual a ni. Hei vang hian R Lalhmingliana te chhungkua hi Thawhlehni zan lam khan an ṭhenawmte inah chaw eiin an riak rih a ni.
In ṭhiah a nih thu hriat a nih veleh police-te an kal nghal a, Thawhlehni khan nilengin an veng zui a ni. Nimin lamah thil dang thleng zui a awm lo a, police-te pawhin an veng zui tawh lo niin Bawngkawn Police Station aṭanga thu dawnna chuan Vanglaini a hrilh.
Nimin vek khan Bawngkawn Local Council leh YMA hruaitute leh J Thankima College hotute an ṭhukhawm a; in ṭhiah tâk luahtu R Lalhmingliana te chhungkua awm lailâwkna atan J Thankima College building, an Students Union-in office atana an hman chu ruahman turin an rel tih, Bawngkawn LC Chairman Lalduhkima chuan a sawi.
B Lalhmangaihi in, R Lalhmingliana te chhungkuain an luah mek hi February 3, 2018 khan J Thankima College zirlaite chuan an college campus chhunga mimal in sak nia an hriat avangin ṭhiah an lo tum tawh a, hmun ṭhenkhat lai khawih hman mah se, an ṭhiah hmain police-te'n an dang hman.
February 3-a J Thankima College zirlaite'n an khawih ṭum hian in kawta hulhliap zâr, eirawngbawlna atana hman an tihchhiatsak a, tuizem pahnih an lumsak bakah, a bang ṭhenkhat an pawt kau hman a ni.
February 3-a an chet chhuahnaah hian J Thankima College zirlaite chuan resolution siamin, B Lalhmangaihi in luah mektu, R Lalhmingliana te chhungkua chu an college ram aṭanga rang taka chhuak turin an phût bakah, Mizoram sorkar pawh dan loa chhungkua awmte February 18, 2018 hmaa chhuahtir turin an phût a; an hun tiam chhunga an chhuak lo a nih chuan a tawp thlenga an nawr tur thu an tarlang a ni.
Thu dawn danin, B Lalhmangaihi hian in a sakna hmunah hian kum 1970 leh 1973-ah land lease a nei a, a ram huam tel hian Mizoram sorkar chuan kum 2013 khan J Thankima College hmun tur a pe a, land lease pawh kum 2013 vêk khan a pe chhuak a ni.
Aizawl Additional District Magistrate chuan October 3, 2017 khan J Thankima College campus chhunga ram nei anga insawi B Lalhmangaihi chu dan loa in sa a nih thu hriattirin, chhuak turin thu a pe a; Court thupek hi B Lalhmangaihi chuan Court-ah a khing let ve thung a, thubuai hi Court-ah a inchiah mek a ni.