KHAWTHLIR

Minister-in tlawh
School Education minister H Rohluna chuan Thawhlehni khan District Institute of Education and Training (DIET), Champhai a tlawh a, principal RL Thianghlima hoin thawktute'n an lo dawngsawng a, thil pawimawh hrang hrang an sawiho.

NEDP press tour
Lunglei district MJA member-te chuan NEDP hnuaiah press tour-in khawchhak tlangdunga pi leh pute hmun hlui tlawh turin nimin khan Champhai an pan a, February 24-ah Lungleiah an kîr leh ang.

MHIP Rûn hawng
Lunglei West bialtu MLA Chalrosanga Ralte chuan February 20, Thawhlehni zing khan Buarpui MHIP Rûn a hawng. MHIP Run sak nan hian MP fund Rs. 4,00,000 leh bialtu MLA fund Rs. 50,000 hman a ni.

Lirthei tlan dan
PWD Engineer-in-Chief chuan hriattirna chhuahin, Aizawl-Thenzawl-Lunglei kawnga Tlawng-Pukpui inkar chu cement concrete-a siam mek a nih avangin, kawng siam chhunginn motor lian (HMV) leh a laihawl (MMV) zawng zawng chu NH-54 (Aizawl-Serchhip-Lunglei) kawnga tlân turin a hriatir. Motor tê (LMV)-te chu Haulawng-Dawn kawng-ah tlan theih a ni.

MUP khawmpui
Mizoram Upa Pawl, Durtlang Unit chuan nimin khan Durtlang MC Hall-ah annual meeting an hmang a, minister R Lalzirliana'n a hmanpui. Durtlang MUP-ah hian member 331, mipa 138 leh hmeichhia 193 an awm mek a ni.

Legal Camp
Mizoram Legal Services Authority (MLSA) bultumin nimin khan Champhai Kahrawt YMA community hall-ah Legal Services Camp buatsaih a ni a, Champhai District MJA president C Lalhnunpuia'n a hman pui. Inkhawmah hian Mizoram Motor Accident Claims Tribunal (MACT) presiding officer KL Liana leh senior advocate KV Tlangmawiaten Court-a thubuai ngaihtuah anih dan leh hremna pek anih dan an sawifiah.