Ram tha tak nei chunga thar chhuah A hlâwk lo hi inenfiah a ngai - Lalsawta

Irrigation & Water Resources (IWR) department bultumin nimin khan Dam Dam Hall, Champhai Zotlangah Champhai leh a chhhehvela irrigation project hnuaia Water Users’ Association (WUA) Meet buatsaih a ni a; khuallian, Finance minister Lalsawta chuan, ram ṭha tak nei chunga thar chhuah a hlawk thei lo chu in enfiahna tur a nih thu a sawi.

Lalsawta chuan, lo neitu chu kan ram neih chhun enkawl tura ṭan la turin a fuih a, "Ram ṭha tak nei chunga thar chhuah a hlâwk thei lo hi in enfiah a ngai. Khamkhawp buh leh bâl thar chhuak tura ṭan lak a ngai. Lo neitute pawhin an koa tla tih turte rinawm leh taima taka an thawh a ngai a, an theih bakah chuan sorkar pawhin a tih tur chu a ti ve mai dawn a ni," a ti.

Finance Minister chuan, tunlai harsatna lian tak chu sum awlsam leh hnathawk loa awm theihna a nih thu sawiin, "Hei hian kan nunah thil pawi tak a thlen a ni. Kan ni tin nunah eizawnna leh hnathawh chungchangte hian hun tam zawk luah ṭhin se, chu chuan rah duhawm a chhuah a rinawm," a ti a; taima leh rinawm taka ram leh hnam tana thawk zel turin WUA member-te a chah.

IWR minister KS Thanga pawhin thu sawiin, Agriculture department tihhmasawn nan sorkarin nasa takin hna a thawh thu a sawi a, "Irrigation hi agriculture din chhan leh innghahna pawimawh tak a ni," a ti. Kum 30 chhunga Mizoram buh mamawh chanve thar chhuak thei turin Japan International Cooperation Agency nena thawkhoin project buaipui mek a nih thu a sawi bawk.

Inkhawm hi IWR secretary H Laleng­mawia'n a kaihruai a; WUA hnuaia zautin aiawhte chuan an hmalak dan, project an chhawr ṭangkai dan, tuihna ṭha tak nei thei tura an hnathawh dante leh sorkar aṭanga an mamawhte an sawi a ni.