PWD Minister-in Aizawl-Lunglei kawng a en

PWD minister Lal Thanzara chuan nimin khan Aizawl-Lunglei Work Bank Road a tlawh a; Pukpui leh Tlawng inkara kawng chhia siam mek dan enfiahin, rigid pavement hna bakah, hna dang tun maia tih thei ang chite official-te a sawipui.

Lal Thanzara chuan, Aizawl-Lunglei kawng chu Mizoram chhim lam tan châkkhai lakna kawng ber a nih thu sawiin, "Theih ang angin kawng hi kan enkawl mek a, state sorkar enkawl a ni a, sum leh pai duhthusam kan nei lo. Harsatnate kan nei ṭhin a, mahse, chuti chungin NEDP leh sum dang dangte ruahmanin theitawp kan chhuah mek zel a ni," a ti.

PWD Minister chuan, hmun tam taka kawng khuarte chu hnawh mek ni mah se, rei a daih dawn loh avangin carpeting estimate siam vat turin PWD hotute siam vat turin a hrilh thu sawiin, "Estimate hi peih vat tum a ni a, NEDP sum awm ang ang dap kan tum," a ti a; a ṭul chuan sorkar kum thara rulh turin a bá pawhin tih dan kawng zawn an tum thu a sawi.

Sorkar thuchhuah tarlan danin, Pûkpui leh Tlawng inkar kawng chhe lai zual bik hmun pakuaah rigid pavement siam turin ruahman a ni. PWD chief engineer (Roads) R Lal­rintluanga sawi danin, contractor pahnihte hian hna thawh ṭan an tum a, khawl bun hna leh hmanraw lak khawm leh mihring lak khawm hna an thawk mek a ni a; kawng siam hna hi a rang thei ang berin ṭan tum a ni.

Pukpui leh Tlawng inkara cement concrete-a siam tur chin hi km. 2 vela thui a ni a, kumin fûr hma ngeia zo hman tura beisei a ni. Kawng chhe zual lai siam nan hian Mizoram sorkarin NEDP sum Rs. 2,00,00,000 a ruahman belh a, a hmain PWD aṭangin Rs. 1,70,00,000 leh NEDP aṭangin Rs. 1,00,00,000 pek a lo ni tawh bawk.

Aizawl-Lunglei World Bank Road hi kum 2010-ah Mizoram PWD kutah hlan a ni a, state highway angin enkawl a ni.