Mizoramah HIV/AIDS a hluar ber - PD, MSACS

Mizoram State AIDS Control Society (MSACS) hnuaia targeted intervention (TI) programme-a thawk mek NGO-te hnathawh dan thlirletna leh ruahmanna thar hmanga hmalak dan tur sawihona nimin khan neih a ni. He hunah hian MSACS Project Director chuan, Mizoram chu India rama HIV hluar berna a nih thu sawiin, HIV/AIDS do kawngah nasa leh zuala ṭan a ngaih thu a sawi.

Review Meeting on Surveillance hawnnaah MSACS project director Dr Lalmalsawmi Sailo chuan, Mizorama HIV darh zel tur venna kawng­a a tak taka hmalatu NGO project manager-te chu an hnuaia thawkte hna thawh dan vil uluk lehzual tur­in a chah a, "Min chîm mektu heroin hi a pun zel avangin rua­hmanna danglam leh thar deuh kan dapchhuah zel a ṭul a ni," a ti.

Meeting-ah hian, ruihhloa inchiu ṭhinte'n NGO-te drop-in centre-ah kher lo pawh inchiuna hriau thar an lak theihna tura NACO-in a ruahman, Secondary Distribution of Needle and Syringes (SDNC) hmun thar neih a harsat thu sawi a ni.

Hemi chungchangah hian Dr Lalmalsawmi Sailo chuan, inchiuna hriau sem chhuahna mumal tak neih a nih loh chuan inchiu ṭhin an awm reng tho si avangin, a ruka HIV inkai darhna nasa lehzual a thleng thei tih a sawi a; chu chu mipuiin an hriatthiam a ngaih thu a sawi.

MSACS Project Director sawi danin, HIV kai zat chhiarpui hneih hnuhnung ber result, December 6, 2017-a tlangzarh takah Mizoram chu pakhatna a ni a, Nagaland leh Meghalaya te pa­hnihna leh pathumna an ni. A hnuaia table hi nu nau pai zinga HIV hrik pai awm zat a ni.