Sports Minister-in office sak mek a tlawh

New Secretariat Com­plex chhunga Youth Recreational Centre cum Amalgamated Office Com­plex for Sports & Youth Services department tur sak mek chu nimin khan Sports & Youth Services minister Zodin­tluanga'n a tlawh a, hna thawh dan a enfiah.

Zodintluanga chuan, hun rei tak aṭanga an nghahhlel em em, office changtlung tak SYS department-in an nei tur chu a lawmpui thu sawiin, "Mizoram State Sports Council chu kum 42, Sports Directorate pawh kum 32 lai ding tawh chung pawhin mahni office building nei loin an awm reng a; tuna building sak mekah hian directorate leh MSSC hnathawkte an leng vek dawn a, hei hi anmahni dawr pawh a tiawlsam sawt dawn a ni," a ti.

Office building tur sak mek hi NEC aṭanga sum hmuh hmanga sak a ni a, first instalment cheng nuai 416 hmuh a ni tawh. Building hi chhawng riat a ni dawn a; chhawng hnih (ground floor & first floor) chu motor parking atan hman a ni ang a, a chung chhawng thum chu office room hrang hrang tan hman a ni ang.

Kawngpui hnuai lamah basement pali a awm dawn a, chowkidar quarters, gym, museum, store room, recreational hall, scouts & guides wing, adventure wing, NCC leh NSS wing-te an awm dawn a; a chhawng chung berah mi 150 lenna conference hall a awm dawn a ni.