Covid-19 dona atan Mizoramin Cheng vbc. 44.3 a dawng dawn

Sorkar laipui chuan Covid-19 dona atan Covid-19 Emergency Response and Health System Preparedness Package (ECRP) Phase-II hnuaiah Mizoram sorkar hnenah cheng vbc. 44.3 a pe dawn.

Sorkar laipui chuan tun hnai khan Covid-19 dona atan India ram pum tan ECRP-II hnuaiah cheng vbc. 23,000 a pe chhuak a, chuta ṭang chuan hmarchhak state-te'n cheng vbc. 1,352.92 an chang dawn a, Mizoramin cheng vbc. 44.3 a chang dawn a ni.

Covid-19 dona atana sorkar laipuiin sum a pek chhuah hi hmarchhak state zinga a dawng hnem ber tur Assam-in cheng vbc. 812.46 a dawng dawn a, a dawng tlem ber Sikkim-in vbc. 21.85 an dawng dawn a, Sikkim hi Mizoramin a dawt.

Vanglaini thu dawn danin, Mizoram sorkarin a dawn tur cheng vbc. 44.3 chu Covid-19 swab test tihna atana ruhrel (infrastructure) tur dinna atan te, damdawi dahṭhatna siamna, Covid-19 veite enkawlna tur khum siamna, naupang enkawlna tur siamna, ventilator leh oxygen atante leh medical facilities dang atan hman tur a ni.

Mizoram sorkarin a dawn tur cheng vbc. 44.3 hi state budget páwn lama a dawn tur a ni a; chutih laiin, Finance department chuan sum hian Finance a kaltlang dawn nge, Health department-ah direct-in a lut dawn tih an la hre lo.

ECRP-II hnuaia India hmarchhak state-te tana cheng vbc. 1,352.92 dah a nih thu hi Union Health minister Mansukh Mandaviya chuan August 17, Thawhlehnia hmarchhak state health minister-te nen an ṭhutkhawmah a puang a ni.

Union Health Minister chuan, a theih ang angin sorkar laipuiin state-te hnenah Covid-19 dona atan ṭanpuina a pek zel tur thu a sawi a, "Central leh state kan thawkho ang a, Covid-19 hi kan thunun thei ngeiin ka ring," a ti.