Meghalaya Planning Board Chairman-in Chief minister Zoramthanga a kâwm

Meghalaya State Planning Board chairman Lambor Manngiang, MLA chuan nimin khan Mizoram Planning Board chairman Zoramthanga, chief minister chu a pisaah a kâwm a; econo­my tihhmasawnna tur leh a kaihhnawih thil pawi­mawhte an sawi dûn.

Lambor Manngiang chuan, Mizoram leh Me­ghalaya chuan hman aṭang tawhin inlai­chìnna ṭha tak an nei tawh tih sawiin, "Vawiin thlengin a la nung reng a ni. Meghalaya-a ka bial chhungah Mizo tam tak an chêng a, thawhhona ṭha tak kan nei. Hma lam pana ke kan pênnaah inen hrang loin, kan inunauna a ngheh zel ka beisei," a ti.

CM Zoramthanga chuan, boruak muanawm zawk an neih a duhsak thu Lambor Manngiang a hrilh a; Meghalaya economy hmasawnna turah Mizoramin ṭangkaina a nei thei dawn a nih chuan theihtawp a chhuah tur thu a sawi.

Meghalaya Planning Board Chairman hian nimin vek khan Mizoram State Planning Board vice chairman H Rammawi chu a pisaah a kâwm bawk a, hma lam hun atana state pahnihte thawh dunna tur chungchang an sawi dun a ni.

H Rammawi chuan, Mizoram State Planning Board kalphung tlangpui a sawifiah a, "Hmarchhak state-te inpumkhatna atan Mizoram leh Meghalaya-in thawh dunna ṭha tak a nei hi a lawmawm hle a ni," a ti.