2021-ah ruihhlo vangin mi 37 thi tawh

Excise & Narcotics department (END) chuan kumin 2021 chhungin rakzu litre 25,609 leh heroin gram 9.932 an man tawh a, kuminah ruihhlo vangin mi 37 an thi tawh tih an tarlang.

Excise & Narcotics department tarlan danin, END hian kumin January aṭanga August 17 thleng khan rakzu litre 25,609, zu bilh lai ṭin 64,933 leh heroin kg. 9.932 manin, dan bawhchhia mi 1,877 an man tawh a; kumin chhungin ruihhlo vangin mi 37 (mipa 34 leh hmei­chhia 3) an thi tawh bawk.

END hian August 17, Thawhlehni zan dar 11:40 khan Siahaa Bualpui-NG kawngah heroin gram 124 (hawng 10) leh a neitua puh mi pali - Gospel Vanlalliana (26) s/o Lalpiangthara leh Vanlalngheta (24) s/o Lalpiangthara, Bulfekzáwl Champhai district, Runkianlova (41) s/o Hrangthanduna, Champhai Dinthar Veng leh Thanglianmunga (48) s/o Nghiandothanga, Bawngkawn Brigade veng nia inchhálte chu an man.

Heroin an man rual hian a phurhna atana an hman Maruti Alto car MZ01 B-2170 pawh an hrênsak a, The Narcotic Drugs & Psychotropic Substances Act, 1985 tlawhchhanin thubuai ziah luh a ni.

Thawhlehni vêk khan END chuan Rangvamual leh a chhehvelah dan kalha zu thlawrna hmun eng emaw zat an tichhia a, rakzu siam sa leh zu bilh lai tam tham tak an tihchhiat bakah an man a ni.

END chuan, danin a khap angin zu leh a kaihnawih thilah fihlim turin Mizoram mipui an ngen a, "Bungrua leh passenger phur lirthei khalh­tute pawh hetianga dan phal loh thil phur lo tur leh theihtawpa fimkhur turin kan ngen a ni," an ti.