Two wheeler taxi khalhtute ṭhahnemngai

Covid-19 léng avangin thla thum chuang inkhàrkhip leh inkhuahkhirhna kalpui a ni a, inkhuahkhirhnate hlih a nih hnuah sumdawng lirtheite a inchhâwka tlân phal a ni. Two wheeler taxi khalhtute chuan an tlân theih hnuah ṭhahnem an ngai hle a, hmun tam takah chuan zing aṭangin an thawk chhuak ṭan ṭhin.

Vanglaini palaiin two wheeler taxi khalhtute a biak kualna aṭanga a lan danin, hun rei tak hna an thawh theih loh avangin an tlân theih chhunah chuan a tam thei ang ber hlawh chhuah tumin ṭan an la hlawm a ni.

Chutih laiin, intlan chhâwk avangin chawlhkar khatah ni hnih (a ṭhen ni thum) chiah an tlân chhuak thei a, ni khatah tlân chhuak thei tlém mah se, boruak ziaawm deuh lai angin phurh tur (passenger) an hmu tam chuang lo.

Aizawl Two Wheeler Taxi Association (ATTA) hruaitute hnen aṭanga thu dawn danin, tun dinhmunah member 1,800 vel an nei mek a ni. Inkhàrkhip lai khan an member tam tak chuan harsatna an tawh avangin chhawmdawlna pek an ni a; ṭhenkhat chuan loan hmangin two wheeler taxi tur an lei a, chu'ng mite chuan inkhàrkhip an tuar zual hle.

Zawhna chhangin ATTA hruaitute chuan, an member zingah an passenger-te aṭanga Covid-19 kái an la awm loa an hriat thu an sawi a, "Kan member ṭhenkhat chu hripui vei an phurh avanga khung hran an awm. Mahse, chu'ng mite pawh chu vanneihthlak takin test an nihin an fihlim vek a ni. Kan hriat theih chinah chuan passenger-te aṭanga hripui kai kan nei lo," an ti.