Ramri chungchanga Assam laka tlânchhe saah Mizoram sorkar puh

Peoples' Conference party president Lalhmangaiha Sailo chuan thuchhuah siamin, 'Mizoram leh Assam ramri chungchang sawihonaah kum 1875-a ramri siamin sawi a hlawh nêp hle laiin, constitutional boundary thâwm a ri ring hle thung niin a tarlang a, "Hei hian a engamah hmain Assam sorkar lakah Mizoram sorkar a tlânchhe sa nghal ringawt tih a tichiang hle a, a pawi hle a ni," a ti.

Lalhmangaiha Sailo chuan, ramri chungchang sawinaa Mizoram sorkar telna rêng rêngah 1875 ramri chu a bulṭhut atana hman a ngai tih sawiin, "Opening argument a nih phawt a ngaih laia state pahnihte ṭhutkhawmna reng rengah sawi rîk a la ni lo hi mak ka ti a, a ngaihṭhat thlak loh hle a ni," a ti a; 1875 ramri chu Mizoram hotute'n a hun takah an sawi ri ngam lo ṭhin niin a sawi.

Ramri chungchanga Mizoram ṭanfung atana chhawpchhuah ngai document-te a awm ṭha thawkhat tih sawiin Lalhmangaiha chuan, "1875 ramri thláwp tur hian notification la supersede loh tih te, pillar 46 phûm a ni tih te, Survey of India marking hrang hrangte satellite hmang pawhin a hmuh theih vek dawn a ni," a ti.

PC President chuan, "Ramri chungchangah hian court hmaah pawha kan chak theihna tur hnialna ṭha leh solid taka kan din theihna tur leh pawm theih tur kan nei a, opposing argument zawng zawng pawh kan sawi mâm theih vek a rinawm a ni," a ti bawk.