Health Minister-in Covid-19 do dan Kolasib district thuneitute a sawipui

Health minister Dr R Lalthangliana chuan nimin khan Kolasib DC conference hall-ah Kolasib DC Dr H Lalthlangliana, sorkar official dangte leh Joint Village Task Force hruaitute a kâwm a, Covid-19 donaa hmalak dan leh hmachhawpte a sawipui.

Dr R Lalthangliana chuan, Kolasib district-a sorkara mawhphurtute, tlawmngai pawlte leh mipuite chu hripui donaa an hmalakna fakawm a tih thu a sawi a, "Mizoram district dangte hmachhawn ve loh, ramri chungchanga buaina leh state luhkapui a nih anga mikhual chhâwntu ni chung pawha hri donaa hmalakna ṭha taka kalpui a ni hi a lawmawm hle," a ti.

Covid-19 vanga thi zat hmarchhak state dang nena khaikhinin, Mizoram chu dinhmun ziaawm ber a nih thu sawiin Minister chuan, "Hei hi sorkar leh tlawmngai pawl hrang hrangte thawhhona ṭhat vang a ni," a ti a; hripui leng thawh hnihna hmachhawn meknaah leh thawh thumna thleng thei lakah tha thlah loa ṭan la chhunzawm zel turin a chah.

Health Minister chuan, Kolasib district-a hripui vei, natna lang chhuakte chu DCHC hmunhmain a daih lo a nih pawhin SRH-ZMC-a enkawl zung zung a nih theih nan damlo inhlan chhawn dan tur ruahmanna fel tak kalpui tum a nih thu a sawi a, "Naupang enkawlna tur bik, a hranna hmun buatsaih a nih theih nan hma in lak a pawimawh," a ti.

Dr R Lalthangliana chuan Thawhlehni khan Union Health minister Mansukh Mandaviya hoa India hmarchhak state Health minister-te Covid-19 hripui leng chungchanga ‘Review Meeting on Covid-19 Pandemic and Immunization in North Eastern States’ Guwahati-a an neihah chuan Mizoramin Covid-19 hripui leng hmachhawn dan leh hma­chhawp a neihte a sawifiah thu a sawi.

Kolasib DC chuan, an district-a hripui vei zat sàn chhan ṭhenkhat sawiin, "State páwn aṭanga Railways-a hnathawk te, loh theih lohna vanga ramria duty IR police te, NGO anga a huhoa inenkawlna aṭanga inkai darhna vang leh Vairengte, Bairabi leh hmun ṭhenkhata endikna kalpui reng a nih vang a ni," a ti a; thawhhona leh inpekna thûk tak nen hripui an do thu a sawi.

Kolasib CMO Dr Lalhlimpuia sawi danin, an district-ah August 17, Thawh­lehni thlenga chhinchhiah danin Covid-19 vaccine first dose 78.64% leh second dose 34.67% pek a ni tawh.