Zirlai tiṭhate chawimawina hlan

Lunglei College chuan nimin khan an college zirlai ti ṭhate chawimawina hun an buatsaih a, Lunglei DC Kulothungan A-a'n a hmanpui. Zirlai 18 hnenah chawimawina hlan a ni.

Lunglei Bawrhsap chuan fuihna thu sawiin, "He college aṭang hian zirtirtute leh zirlaite tumruhna avangin hlawhtlinna chang mi tam tak an awm tawh. Mihring kan nih chhungin theihna hrang hrang kan neihte ṭangkai taka hman a pawimawh a, chumi atan chuan tumruhna leh taimâkna neih a ngai," a ti.

Chawimawina hi Lunglei College aṭanga Mizoram University hnuaia under graduate exam-a B.A leh B.Sc-a ti ṭha zual mi pasarih leh mark hmu sang mi 11 hnenah hlan a ni.

College prinicipal LH Rothanga sawi danin, Lunglei College hi kum 1964-a din niin, kum 1976-ah sorkarah dah ngheh a ni a, kum 2017-ah NAAC grade B++ a hmu. Tun dinhmunah zirtirtu 69 leh non-teaching staff 15 an awm a, zirlai 1,236 an awm mek a ni.