September 3-ah Zirtirtute Ni

School Education secretary Dr Lalzirmawia hoin nimin khan Secretariat conference hall-ah kumina Zirtirtute Ni (September 5) hman dan tur rêl a ni a; kumina Zirtirtute Ni chu Pathianni a nih avangin September 3, Zirtawpnia hman an rêl.

Meeting chuan, Covid-19 léng avangin Zirtirtute Ni chu tih dan phung pangngai anga hman a remchang lo a nih pawhin, a theih ang anga hman ni se, an ti. District-ah chuan DC-te kaihhruaina hnuaiah hman dan tur rêl a, ṭha an tih anga hman ni se, an ti bawk.

Sum tuak dan tur sawiho a ni a, kum danga an tih ṭhin angin zirtirtu pakhat zelin Rs. 50 thawh leh ni se, Covid-19 avangin kuminah sikul naupangte'n tihluihna awm loa Rs. 10 an thawh ṭhin chu àwl ni se, an ti. Sum thawh khawmte chu zirtirtu, natna khirhkhàn tuarte ṭanpuina atan hman tur a ni.

Zirtirtute Ni pual hian zirtirtu ṭha chawimawina, national leh state award dawngte chu an awmna district ṭheuhah remchang an tih angin chawimawi ni se, an ti bawk.