KHAWTHLIR

Thisen pe
Mizoram School of Photography chuan vawiina World Photography Day pualin nimin khan Civil Hospital, Aizawl Blood Bank-ah thisen pek an huaihawt a, mipa 18 leh hmeichhia pahnihte'n thisen unit 20 an pe. Lungleia Zion unit ṬKP pawhin nimin khan Civil Hospital, Lungleiah thisen unit 12 an pe a, petute mipa 11 leh hmeichhia pakhat an ni.

CM Relief Fund
Covid-19 dona atan nimin thleng khan Chief Minister Relief Fund-ah Rs. 30,22,49,878 a lut tawh a, chuta ṭang chuan Rs. 26,79,80,470 hman tawh niin, hman loh Rs. 3,42,69,408 a la awm.

Huiva tlangzarh
Aizawl Two Wheeler Taxi Association-te'n anmahni hmang duhtute'n awlsam leh rang zawka two wheeler taxi an koha an hman theihna atana duan mobile application Huiva an siam chu nimin khan Information & Technology minister Robert Romawia Royte-in Aizawl Press Club-ah a tlangzarh. Huiva hi Playstore aṭangin download theih a ni.

Ar sa man
Aizawl DC Dr Lalhriatzuali Ralte chuan Aizawl Municipal Corporation huam chhung hman turin ar sa man a bithliah thar. Ar sa chu puah loh kg. khat Rs. 210 leh puah sa Rs. 320-a zawrh tur a ni.

MP Vena chawimawi
MZP Gen. Hqrs chuan nimin khan an pisaah Rajya Sabha MP K Vanlalvena an chawimawi a, thuziak leh Tawlhlohpuan an hlân. MZP president B Vanlaltána chuan, ram leh hnam tana thawh hlâwk leh ram damna tura thawk ṭha tu pawh chawimawi phute chu MZP-in an chawimawi ṭhin angin K Vanlalvena pawh an chawimawi tih a sawi.

Minister-in hlan
Guwahati-a meeting-a kal Health minister Dr R Lalthangliana chuan nimin khan Silchar Branch YMA hruaitute Silchar Mizoram House-ah a kâwm a, a ṭula an hman atan Rs. 10,000 a pe. Vairengtea ramri hrûla duty police-te pawh tlawhin, DIG (NR) Lalbiakthanga Khiangte leh police hotu dangte nen an inkâwm a, Rs. 10,000 a hlân nghal bawk.