Covid-19 vangin mi 2 thih belh
Thawhlehni zan leh nimin khan Covid-19 vei enkawl lai mi pahnih an thi. Sorkar chhinchhiah angin, nimin tlai dar 5 thlenga hripui vanga Mizorama thi chu mi 186 an ni tawh a; August thla bikah mi 38 an thi tawh.
Hripui vei State Referral Hospital (ZMC)-a enkawl mek C Lalthlamuana (73) h/o Zoramthari, Chaltlang Lily Veng chu Thawhlehni zanlai pelh hnu, August 18, dar 12:05 a.m khan a thi a, nimin chawhma dar 11 khan Lily Veng Presbyterian Kohhran Hall-ah vui a ni. Covid-19 positive a ni tih July 29, 2021 khan hmuh chhuah a ni a, July 31 aṭangin SRH-ZMC-ah enkawl a ni tih sorkar thuchhuakin a tarlang.
Nimin tlai dar 3:50 khan Lalramchhana Ralte (57) h/o Lawmzuali, Armed Veng South pawh hripui vangin SRH-ZMC-ah a thi a, nizan dar 8 khan vui a ni.
Armed Veng South YMA hruaitute hnen aṭanga thu dawn danin, Lalramchhana hi thaw-hah a neih avang leh Covid-19 vei nia rinhlelh a nih avangin SRH-ah dah luh a ni a; swab test-ah hun eng emaw chen a negative hnuah July 14, 2021 khan Covid-19 positive a ni tih finfiah a ni.