Task force member leh volunteer-te A thlàwna enkawl turin sorkar phût

Mizoram Pradesh Congress Committee (MPCC) chuan thuchhuah siamin, Mizoram sorkar chu a intiam angin local/village task force member leh volunteer zinga Covid-19 veite a thlàwna enkawl ngei turin an phût.

MPCC chuan, Mizoram anga mipuiin Covid-19 donaa sorkar an thlàwp ṭhatna leh ṭanpui nasatna ram a awm lo tih sawiin, "Sorkar tibuai hauh loa Covid-19 veite khawtlangin an enkawlna 4C kan tihte hi hmun dangah hmuh tur a awm ve lo. Mipui lam hian VTF/LTF kaltlangin sorkar tih tur zatve (50%) chu an tihsak niin a lang," an ti a; hlawh leh hamṭhatna nei loin task force-te'n theihtawp an chhuah thu an tarlang.

Congress party tarlan danin, September 20, 2020 khan Mizoram sorkarin Memo no. D-33011/21/2019-HFW (nCOV),/Vol.I1/36: Dated Aizawl, the 9th Sept, 2020 a tichhuak a; chutah chuan Covid-19 dotu frontline worker, sorkar hnathawk nghet ni lo te, task force member leh volunteer-te'n Covid-19 an kai chuan a thlàwn veka enkawl tur a ni, tih a ni.

Sorkarin thuchhuak a nei tawh chungin task force member ṭhenkhat Covid-vei ZMC-a enkawlte'n a thlàwna enkawlna an dawng thei lo tih sawiin MPCC chuan, "Sorkarin a thlàwna enkawl an nih tur thu thuchhuah siam meuhin tarlang mah se, a takah chuan a thlàwna enkawl an ni lo a, bill an chawi vek tho a ni," an ti.

Sorkar thil tih dan chu an hrethiam thei lo tih sawiin MPCC chuan, "Frontline worker VTF/LTF-te bakah, mipui zah lohna dik takah kan ngai," an ti a; task force member leh volunteer-te chu kum khat chuang hah taka hripui donaa thawk tawh an nih avangin a thlàwna enkawlna pek ngei an duh thu an tarlang.

MPCC chuan, CM Zoramthanga’n Covid-19 do nan sumah 'limit' a awm dawn loh thu a sawi tawh thu te, MNF sorkarin an party worker-te contract pek an ṭhulh loh thu te, Rawmi chìn nan cheng vaibelchhe tél an sên theih thu te, PAHOSS-ah vaibelchhe tam tak an hman theih thu te, mipuiin hripui do nan CMRF-ah cheng vbc. 26 chuang an thawh tawh thute an tarlang a, "Heti chunga Covid-19 donaa a hmatáwnga awm, sorkara bill ve thei lote sorkarin a thlàwna a enkawl thei lo hi hriatthiam theih a ni lo. Sorkar hian mipui leh VTF/LTF leh mipui hi hmanrua atan chauh min duh tihna a ni," an ti.

Congress party chuan, Mizoram sorkar chu a intiam tawh anga VTF/LTF member leh volunteer zinga Covid-19 veite a thlawn veka enkawl tur leh a thlàwna enkawlna dawng loa bill pe tawhte pawh pawisa pe kîr leh vek turin an phût a, "Sorkarin a bawhzui nghal lo a nih chuan na takin hma kan la dawn," an ti a; hripui donaa MNF sorkar chêt dan chu ṭha lo an tih thu an tarlang bawk.