Lailapur-ah police-in Mizo an man : Inbumna avanga manah an ngai

F Lalrotluanga, Bilkhawthlir chu August 17, 2021 khan ruihhlo kaihhnawihah Assam police-te'n Lailapur-ah an man a; Bilkhawthlir Joint YMA leh Bilkhawthlir Driver Association-te chuan, inbumna avangin Assam police-te'n an mana an ngaih thu an tarlang.

Bilkhawthlir Joint YMA thuchhuah tarlan danin, F Lalrotluanga hi Bilkhawthlir-Kolasib bus service ṭhin neitu leh khalhtu a ni. Vawiin hian Shillong-ah pastor thlah tur a nih avangin August 17, Thawhlehni khan Assam-ah a motor enfiahtir tura kal a tum laiin, hnam dang motor pick-up (TATA Ace)-a chuangte'n Burma kuhva tam vak lo an phurh chu Lailapur police checkgate paltlangpui an huphurh avang leh police-in bus an endik ve ngai loh chhuanlamin phurhsak tura an ngen angin a phurhsak a ni.

Lailapur gate-ah hian Assam police-te'n an lo endik a, kuhva ip karah heroin an hmu nia sawiin F Lalrotluanga chu an man a ni. Kuhva neitute erawh hmuh zui tur an awm lo.

Thil thlengah hian thil dik lo inphûm ru awm tlata an hriat thu tarlangin Bilkhawthlir Joint YMA chuan, "Lalrotluanga hi ruihhloa sumdawng duh chi a ni lo tih kan hriat chian avangin, inbumna hmanga mi ṭha, misual anga lantir duhtute hi kan dem tak zet a ni," an ti.

Bilkhawthlir Joint YMA chuan, thil thleng chu Assam police-te'n Mizoram police an hrilh duh lo nia tarlangin, "Kan police-te'n biakpawh an tum pawha an phone an switch-off tlat hlawm aṭang pawhin thil dik lo a awm a ni tih a chiang hlein kan hria," an ti. Bilkhawthlir Joint YMA leh Driver Association-te chuan Lalrotluanga chungchangah hma la turin Mizoram sorkar an ngen a ni.