NIAS leh MBOCWWB chungchangah MNF party-in ACB-ah FIR an thehlut

Nalanda Institute of Advance Studies (NIAS), Kolkata-a Mizo zirlai 32 tirhna atana sum hman chungchangah, MNF party-a Vigilance Committee chuan nimin khan Anti Corruption Bureau (ACB)-ah first information report (FIR) an thehlut.

FIR thehluhnaah hian MNF secretary te, Vigilance Committee mem­ber-te leh MNF ṭhalai hruaitute kalin, ACB SP John Zothan­sanga hnenah FIR an thehlut a; NIAS kaih­hnawiha Mizoram Youth Commission (MYC) leh Mizoram Building and Other Construction Workers and Welfare Board (MBOCWWB) ten dan kalha MBOCWWB sum an hman leh sum tihchingpen a awm nia an hriatah thil pathum chhui turin an ngen a ni.

MNF party tarlan danin, NIAS-in Mizoram Advocate General kaltlangin Rs. 4,20,000 ṭheuh cheque 10, a vaiin Rs. 42,00,000 an pek let thu February 23, 2017-ah Chief Minister-in media-te hnenah a sawi a; chutih laiin, November 16, 2017-a LESDE Minister-in Assembly-a zawhna a chhannaah, 'NIAS-in Mizo zirlaite zir man Mizoram sorkarah a la rawn pe lêt lo,' tiin a chhang thung.

MNF chuan, "Cheng nuai 42 hi NIAS-in an rawn pe let a nih chuan, MBOCWWB sumah emaw, Mizoram sorkar sum báwmah emaw a lut ngei tur a ni a, heng pahniha a lut lo a nih si chuan tu nge sum hi lo chheprelh tih a rang thei ang bera chhui chhuak turin kan ngen a ni," an ti.

MBOCWWB sum chu dan ang chuan Board member-te chauha hman theih a nih laiin, Board member ni lo NIAS-a zirlai 32-te tana hman a nih chungchangah thil dik lo titu chhui chhuak turin ACB an ngen a; NIAS-a kum thum zir turah zirlai 32 tirh nana sum ngai zat Rs. 1,28,19,200 chu kum 2014 chhunga pek tlak a nih chhan leh a mawhphurtute chhui chhuak turin an ngen bawk.

MBOCWWB sum hman danah thil dik lo a awm nia an hriat chungchangah hian MNF ṭhalaite chuan nimin khan Aizawl khawlaiah poster an tár nghal a ni.