HPC(D) hotupa Assam-ah man
Hmar People Convention (Democratics) pêng khat zawka an hotu ber, Lalhmingthanga Sanate chu February 21, Nilaini zan khan Assam police-te'n Assam leh Mizoram inrìnaah an man.
Mizoram Police aṭanga thu dawn danin, Lalhmingthanga Sanate hi January 27, 2018 zan dar 9 vela H Zosangbera kaihhruai HPC(D)-a finance secretary Norbar Sanate (47), Hmarkhawlian, Cachar district-a kah hlum a nih chungchangah man a ni.
Norbar Sanate hi January 27 zan dar 9 velah Hmarkhawlian khawlaiah a tualleng kah hlum a ni a; a ruang chu police-in lain, January 28 khan Silchar Medical College-ah endik a ni.
Zawhna chhangin Mizoram Police hotute chuan, Lalhmingthanga Sanate hi thu zawhfiah atan Mizoram lama la chho turin Assam Police-te dil tumna a awm loh thu an sawi a, "Thil thlenna hmun hi Mizoram páwn a nih bakah, Lalhmingthanga hian lak chhoh ṭul turin Mizoramah thubuai a nei lem lo," an ti.