KOMUL titawp lailawk

Kolasib Milk Producer Union Ltd. (KOMUL)-in bawnghnute sawng­bawlna an kalpui mek chu, harsatna hrang hrang vang­in tihtawp lailawk a ni.

Kolasib aṭanga thu dawn danin, KOMUL hi bawng vulhtute'n bawng­hnute an chhûn luh ṭhat loh vangin amah a inenkawl zo lo. Amaha in châwm zo turin ni tin bawnghnute litre 1,000 vel an hmuh a ngai a, mahse, tun dinhmunah ni khatah litre 400 vel bak an dawng lo.

KOMUL hi bawng vulhtu intêl khawmte ta a ni a, amaherawhchu, society hian thawktu pakhat chauh a ruai a, a bak thawktu dangte chu AH&Vety department-in hlawh an pe a ni.

Bawngvulhtu tam zawk chuan KOMUL-ah hian bawnghnute an chhûng duh lo a, a chhan chu bawnghnute litre khatah fat 3.5% a tlin a ngaih bakah, litre khat Rs. 37-in an laksak thei a, a tehnaah fat awm zat tur tling lo pawh ni se, mimal chuan litre khat Rs. 50-in an hralh thei a ni. Hei vangin KOMUL-a bawnghnute chhung an tlem phah niin an sawi.

Thu dawn danin, KOMUL tih thar lehna atan hian NEDP kal­tlangin sorkarah cheng nuai 70 dilna proposal thehluh a ni tawh a, an hmu thei dawn em tih erawh a la chiang lo. Tihtawp a nih thleng hian KOMUL hian society 10 aṭangin bawnghnute a dawng a ni.