KHAWTHLIR

Lawmman sem
Road Safety Week puala Lawngtlai district-a lirthei fai ber, driver ṭha ber leh traffic police thawk ṭha bera thlante hnenah nimin khan Lawngtlai bawrhsap Dr Arun T pisaah lawmman sem a ni. Lawmman dawngtute chu - lirthei fai berah H Lalengmawia (taxi), driver ṭha berah Lalbiaktluanga (maxicab) leh traffice police ṭha berah constable Lalchhanhima Chhangte an ni.

MUP khawmpui
MUP Aizawl West-II Area 'B' chuan, nimin khan Tuikual North YMA Hall-ah inkhawmpui an hmang a, an hun hmanpuitu bialtu MLA Lalruatkima chuan, tar â tih ṭawngkam paih ṭula a hriat thu sawiin, "Kum upate hi kawng hrang hrangah tawnhriat nghah in ni a, ṭhangthar zelte'n in finchhuahna kan mamawh," a ti. MUP West-II 'B' ah hian member 1,267 an awm.

ASHA training
National AYUSH Mission chuan nimin aṭang khan an conference hall-ah ASHA-te tan ni hnih awh tur, 'Training on General Wellness with Special Reference to Diabetes Mellitus' an buatsaih a, AYUSH kaihhruaina anga hnim leh thlaite hmang ṭangkaia inenkawl dan zirho a ni.

NLUP vawkte
AH & Vety director Dr. Saingura hoin, nimin khan a pisa-ah NLUP hnuaia vawk note sem damlo leh thi chungchanga hmalak dan tur sawiho a ni. Meeting chuan vawkte thi leh damlo awmna Saikao (Serkawr), Siaha district-ah Rapid Response Team (Southern Zone) kaihhruaina hnuaiah a rang lama hma lak leh Serhmun, Mamit district-ah a ṭul anga hma la tura District Rapid Response Team (Mamit) te hriattir nghal an rel a ni.

Chite-ah trekking
Save Chite Lui Coordination Committee, INTACH, Mizoram Chapter leh Bethlehem Vengthlang High School ṭangkawp chuan nimin khan Chite Lui Trekking for School Children an buatsaih. Trekking-in a tum ber chu, zirlaite hnena Chite lui hmelhriat thartir te, Chite luiin chhiat lam a pan zel dan mit ngeia hmuhtir leh chhanchhuah leh humhalh duhna thinlung puttirte a ni.