KMMTTP-ah hna thawh chhunzawm phal lo

Lawngtlai District Land Owners Association (LDLOA) chuan, zangnadawmna an phût avangin Kaladan Multi Modl Transit Transport Project (KMMTTP) kawng an dan an chawlhsan a; mahse, kawng siamtu company-te hna thawk tur erawh dan chhunzawm an tum.

LDLOA hruaitute chu nimin khan Lawngtlai DC Dr Arun T-in a pisaah a kâwm a, an harsatna tawh a bawhzui dan leh a hmalaknate leh sorkar hotu lute hnena lehkha a thawn dante a sawipui.

LDLOA hruaitute chuan, DC hmalakna chu lawmawm an tih thu leh police leh a kaihhnawih department dang pawh zahawm an tih thu an sawi a; an hma lakpuina chuan rah ṭha a chhuah ngei an beisei thu an sawi bawk.

Bawrhsap nena an inkawm zawhah LDLOA hruaitute chu an ṭhukhawm a, sorkarin a ngennate chu zahawm ti mah se, an thil kalpui lai chu tawpsan mai chi niin an hre lo. Chutih rualin, mipuiin harsatna an tawh loh nan kawngpui dan mek chu hawn ṭha an ti a, kawngpui siamtu company pahnihte erawh chu tiam chin awm loin an hnathawk tur dan chhunzawm zel an rêl a ni.

KMMTTP kawngpui siam mekah ram neitu nia inchhál mi 303 chuan zangnadawmna an hmuh theih loh avangin Feb 20, 2018 aṭang khan kawngpui hi an dang a ni.

Sorkar thuchhuah tarlan danin, KMMTTP kawngpui laih mekin a paltlang ram neitute zinga mi 160 vel chuan zangnadawmna an la tawh a, la la lo mi 300 vel an awm.