Naupang humhalhna dan zirho

Social Welfare department leh National Commission for Pro­­tection of Child Rights (NC­PCR), New Delhi ṭangkawp chuan nimin khan naupang dikna chanvo humhalhna dan, Juvenile Justice (Care and Protection of Children) Act, 2015 leh Protection of Children from Sexual Offences Act, 2012 (POCSO Act) chung­chang zirhona an buatsaih a, Social Welfare minister PC Lalthanliana'n a hmanpui.

PC Lalthanliana chuan, naupangte chu ram nghahfâk an nih thu sawiin, "Nulat tlangval an hriat tak tak hma, naupang an la nih laiin kan tuaihriamin enkawlna ṭha kan pe tur a ni. Boruak muanawm leh hlimawm tak kara chawi len ngai, rilru leh taksa tana pawi thei thil laka venhim mamawh, naupangte kan enkawl danah hian kan hnam ṭhan zel dan tur a in nghat," a ti.

Naupang pualin dan bil pahnih, JJ Act leh POCSO Act-te sorkarin a siam thu sawiin PC Lalthanliana chuan, "Heng dante hi hlawhtling taka kalpui a ṭul a, hemi kawngah hian Mizoram sorkar chuan bung thar a kai a ni," a ti a; State Com­mission for Protection of Child Rights pawh hun rei lo têah office hrang neiin hawn a nih tur thu a sawi.

New Delhi aṭanga workshop hmang tura lo kal NCPCR mem­ber Yashwant Jain chuan, nau­pang dikna chanvo humhim pawi­mawhzia hriain sorkarin dan ṭha tak tak a siam thu a sawi a, "Heng dante hi eng chen nge kan tihhlawhtlin tawh tih leh, hma kan sawn zel dan tur ngaihtuah chu workshop-in a tum a ni," a ti.

Workshop-ah hian mithiam hrang hrangte'n thupui hrang hrang hmanga an thusawi zirho a ni.