Thu dik lo puangzarah MNYF puh

Congress ṭhalai chuan thu­chhuah siamin, Zemabawk-Tuirial kawng, NH-54 siam mek chungchangah MNF ṭhalaite thu dik lo puangzarah an puh.

MNYF hian tun hnai khan Tuirial kawng blacktop hna thawh mek an tlawh a, an hmuh dan media-ah an puan chungchangah MPYCC chuan, "Kawng siam mek chungchangah hian thu dik tawk lo puang zarin, Mizoram PWD hnuaia contractor-te hna­thawh chu ṭha lo leh hman tlak lo angin an chhuah a ni," an ti a; thil awm dan an sawifiah.

MPYCC tarlan danin, kawng siam hna thawh mek chu PWD lamin uluk taka vilin an enpui a, alkatra over burn vang emawa kawng chhuat inchàr ṭha tâwk lo a awm zauh zauh. Blacktop fuh tâwk lote chu contract agreement-a inziak angin siamṭha zel turin PWD lamin contractor an hriattir nghal zel a, siamṭhat ngaite chu rawng varin 'R' tih an ziak zel a, 'R' tih chu 'Rejected' tihna a ni. 'R' tih ziahna laite chu a bul aṭanga siamṭhat leh vek tur niin an sawi.

Kawng siamṭhat ngaite chu February 3, 2018-ah chhinchhiah vek a ni a, contractor-in a siam ṭhat mek laiin MNYF-te'n an tlawh nia sawiin MPYCC chuan, "Rejected kawng siam ṭhat mek tlemtê avang chuan hna thawk chhe em em angin an tarlang lui tlat a. Blacktop hna uluk leh ṭha taka an thawh mekte hmuh kânin, 'R' tih inziak reng chu blacktop ṭha loah an puh a ni," an ti.

Congress ṭhalaite chuan, MNYF-in mipui hnenah thu dik lo an puangzar lui duh chu mak an tih thu sawiin, "Khaw êng pawh an zah hlawl lohah kan ngai," an ti a; Mizoram PWD-in kawng blacktop ṭha tâwk lo lai chhinchhiaha siamṭhat hna an thawk nghal zel chu lawmawm an tih thu an tarlang bawk.