District pali-ah MJA conference neih a ni

Nimin khan district hrang hranga Mizoram Journalists' Association (MJA)-te'n Annual Conference an nei a, kum 2020-2022 chhunga office bearer turte an thlang nghal.

MJA Lunglei District chuan Convention Centre-ah Annual Conference vawi 14-na an hmang a, IPR minister Lalruatkima khuallian niin, Lunglei HPC vice chairman Lawmawma Tochhawng, MLA khualzahawm a ni. MJA Gen.Hqrs., Aizawl 

aṭangin president Zonunsanga Khiangte leh hruaitu dangte'n an hmanpui bawk.

Inkhawm hi Lunglei MJA vice president Lalrintluanga Khiangte-in a kaihruai a; minister Lalruatkima chuan, mipui rorelna sorkarah journalist-te chu 'Fourth Estate' tia koh an nih thu sawiin, "Ram hmasawnna mawhphurtu pawimawh berte zinga mi an ni," a ti.

Lalruatkima chuan, sorkar hmalakna puanzar leh sorkar finchhuah kawngah media mite chu kawng tinrénga thawhpuiah sáwmin, a ṭha zawnga mipui kaihruaitu leh ram hmasawn zelna tura kawng kawhhmuhtu ni zel turin a fuih a; Mizo ṭhalai tam tak social media leh online games-te buaipui a, lehkha chhiar nachang an hre tawh lo chu pawi a tih thu sawiin, lehkha chhiar uar tura infuih kawngah theihtawpa ṭan lak tlàn a ṭul thu a sawi.

Inkhawmah hian Lunglei HPC Vice Chairman, MJA Gen.Hqrs. President leh Lunglei MJA president H Lalthansanga te pawhin thu an sawi a ni.

MJA, Kolasib district chuan MJA Press Club-ah Annual Conference an hmang a, minister of state K Lalrinliana'n a hmanpui. Inkhawm hi Kolasib district MJA vice president Andrew VL Auva'n a kaihruai a, khuallian leh president R Lalhmingthanga ten thu an sawi. Chawhnu lamah rorel inkhawm neih a ni a, kum 2020-22 chhunga hruaitu tur an thlang bawk.

Minister K Lalrinliana chuan, chanchinbumite'n sorkar kalphung dik lo deuhte khalh ngil tura editorial ṭha tak tak an ziak ṭhin chu lawmawm a tih thu a sawi a; Kolasib Press Club chungchangah "Kan CM Pu Zoramthanga'n bul a lo ṭan tawhna hi a hmáwrbâwk hna ka thawk ang," a ti.

Mizoram Journalists Associa­tion (MJA), Serchhip district chuan nimin khan Serchhipa SIRD Conference Hall-ah Annual Conference vawi 13-na an hmang a, district bawrhsap Dr Lalzirmawia Chhangte khuallian niin, Aizawl aṭangin MJA Gen.Hqrs. hruaitu pathumin an hmanpui.

Conference hi Serchhip MJA vice president Kapliana Pachuau-in a kaihruai a; Serchhip DC chuan, chanchinbumite nen thawhhona ṭha tak neih zel a duh thu sawiin, "India ram tiropuitu chu free press, free journalism a ni a, India ram leh Mizoramah chu chu a taka hman a ni. Journalist-te'n zalenna zau tak an nei a, zalenna erawh hman sual loh a ngai. Khawtlang leh ram tana thil ṭha lo dona leh zirtirna 

ṭha mipuia pe turin chanchinbumite kan beisei a ni," a ti.

MJA, Mamit District chuan MJA Press Club-ah Annual Conference vawi 13-na an hmang a, Mamita IPRO Paul Rokima'n a hmanpui. Paul Rokima chuan, MJA member-te chu investigative journalism lam uar tur leh an thu chhuahah hre thawi lo a, thu dik ziktluak taka hriaa chhuah ṭhin turin a fuih a; ṭan lam nei loin, lai taka thil thlir ṭhin turin a chah nghal. Mamit MJA president C Lalramdinzela pawhin thu a sawi bawk.