P&E dept.-in kawlphetha hman man Tihsan rawtna JERC-ah an thlen

Power & Electricity department chuan, kawlphetha hman man tihsan rawtna Joint Electricity Regulatory Commission (JERC) for Manipur & Mizoramah a thlen mek. Hemi chungchangah hian JERC chuan nimin khan P&E Engineer-in-Chief pisa conference hall-ah mipui ngaihdan lakna (public hearing) an buatsaih a, JERC chairman NG Sarat Singh-a'n a hmanpui.

Mizoram P&E department-in kawlphetha hman man tihsan rawtna a thlen chungchanga inràwnkhawmna leh mipui ngaihdan lakanaah hian sorkar official, JERC official leh tlawmngai pawl aiawhte an tel.

Mizoramin kawlphetha hman man (tariff) a hman mek hi unit khatah Rs. 4.60 a ni a, chu chu Rs. 4.67-ah tisang turin P&E department-in a rawt a ni.

Power tariff hman mek rate-ah chuan, kawlphetha hman man chu unit khat man Rs. 7.19 anga chawhrual a ni a, unit khatah mipuiin Rs. 4.60 zel chawiin, a bak Rs. 2.58 chu sorkarin a tum thung. Kum 2017-18 chhunga sorkarin mipuite kawlphetha hman man atana sum a sên chu cheng vbc. 98.67 a ni.

Vanglaini palai zawhna chhangin Central YMA president Vanlalruata chuan, kawlphetha hman man P&E department-in an chhût danah dik tâwk lo a awm niin a sawi a, "Consultant an ruai a, an vil zui tak tak si lo. Corporation report format an hmang a, hei vang hian power hman man an chhût danah dik lo tam tak a awm a ni," a ti.

Vanlalruata chuan, P&E department-in ruahmanna an siam zawng zawng an sawisel vek lo tih sawiin, "Mahse, dik lo tam tak a awm avangin a vai chuan pawm chi-ah kan ngai lo," a ti a; JERC hnenah hian P&E department rawtna an pawm dawn a nih pawhin, a ṭhenkhat lai chaih pawmsak tura rawtna an thlen thu a sawi.

Mizoram Consumers Union (MCU) hruaitute pawhin Vanglaini palai zawhna chhangin, kawlphetha hman man tihsan chu pawl ang chuan ṭha an tih vak loh thu an sawi a, "Ruahmanna ṭhenkhat ṭha tih lai chu kan nei a, ṭha lo tih eng emaw zat a awm bawk. Kum tina kawlphetha hman man tihsan tum ringawt mai hi ṭha kan ti lo a, tuna tihsan an tum dan pawh hi a sang lutukin kan hria," an ti.

P&E department rawtna hi JERC chuan an zir chiang ang a, chumi hnuah Mizoram mipuite kawlphetha hman man tur an bituk dawn a ni. JERC hian ṭum dangah pawh P&E department rawtna chu an rawt ang ang an pawm vek ngai lo nia thu dawn a ni.