Official-te'n an chanvo an hriat a ṭul - Rajya Sabha MP

Aizawl District Development Coordination & Monitoring Committee chu nimin khan Secretariat conference hall-ah an ṭhu a; meeting kaihruaitu Ronald Sapa Tlau, Rajya Sabha MP chuan, sorkar official-te'n an chanvo an hriat reng a ṭul thu a sawi.

Ronald Sapa Tlau chuan, official kalkhawmte chu district tana hmasawnna a awm theih nana hnathawktu pawimawh tak tak an nih thu a sawi a, "Ram hmasawnna tura in chanvo in hriat reng a ṭul. Khawvel kalphung danglam zelah department hrang hrang ṭanrual a pawimawh telh telh a, ṭhahnemngai taka hmalak a ngai a ni," a ti.

Meeting-a tarlan danin, Aizawl district-a MGNREGA kalpuinaah mi 1,05,308 hnenah hna thawhna siamsak a ni a; Sakawrdai Zone, Phullen RD Block leh Thingsulthliah block-ah inhlawhna ni 48 siam a ni tawh a, a bak zawng block-ah ni 42 inhlawhna siam a ni tawh.

Integrated Child Development Scheme (ICDS)-ah cheng nuai 3375.30 hmuh a ni a, aganwadi centre sak nan te, health check-up leh immunization atante hman a ni. Swachh Bharat Mission (Gramin) kalpuina huam chhungah inthiarna hmun panga leh Rural Sanitation Mart hmun parukah siam a ni.

PMKSY-WDC/IWMP hnuaiah project kal lai mek 18 a awm a, watershed area tihzau nan te, tui dahkhawlna atan leh afforestation atan hna thawh a ni.

Meeting-ah hian Aizawl district chhunga MLA zingah Lalthanliana, R Vanlalvena leh Lalrinawma te an tel.