Miin thu dik an sawi duh a nih chuan Sorkar ṭha min ti ang - CM Hawla

Chief minister Lal Thanhawla chuan, miin thu dik an sawi duh a nih chuan, a kaihhruai Congress sorkar chu sorkar ṭha tia an sawi ngei tur thu a sawi.

Nimin Congress Bhavan-a inkhawma thu a sawinaah Chief Minister chuan, khawvela economist leh financial expert ṭhate lo kal se, a kaihhruai sorkar chu 'A ṭha lo' a ni an tih theih lohna turin figure an neih thlap thu a sawi a, "GSDP-ah kan ṭhang chak hle a, India rama state pali GSDP lam ṭha zingah kan tel. Per capita income lamah pawh kan ṭhang chak hle. Hengte hi kan sawi a ni lo a, sorkar laipuia mithiamte sawi a ni," a ti.

Lal Thanhawla chuan, miin dâwt an sawi duh a nih loh chuan Congress sorkar chu sorkar ṭha lo tih theih a ni lo nia sawiin, "Eng ang pawhin miin sawi ṭhin mah se, sorkar hnathawk leh kan hotute zarah sorkar ṭha takin a kal thei a ni," a ti a; sorkar laipui hotute pawhin Mizoramah chuan Congress chu sorkar turin an papêk niin a sawi.

MPCC President chuan, ram hmasawnna atana an hnathawh tawhte chu MNF kum 10 an sorkar chhungin tihchhiat a nia sawiin, "Kum 20 ram páwn aṭanga ram an tihchhiat hnuin, a chhung aṭangin kum 10 chhung ram an tichhe leh a ni," a ti a; MNF thil tihchhiatte chu ram tana thil pawi tak a nih thu a sawi.

MNF-te'n an sorkar chhunga ram hmasawnna tur an tihchhiatte siamṭhat leh hna an thawh mek thu sawiin Lal Thanhawla chuan, "Hmasawna tura hna thawh mekte hi ram tichhetute kutah kan dah leh ngam dawn em ni. MNF ni lo, mi dang han sorkar turin han ngaihtuah dawn ila, unit pakhat pawh nei lo chuan a huphurhawm. MNF an sorkar leh chuan ram an tihchhe vek ang," a ti.

Congress Bhavan-a inkhawmah hian MZP president hlui Lalsang­zuala Ngente leh a thawh­pui ṭhin mi pariatte chu MPCC President-in Cong­ress party-ah a lawm lut a ni.

Lalsangzuala Ngente chuan Congress party a zawm chhan sawiin, "Zo fate inpumkhatna chungchangah tuna kan Chief Minister hi a fakawm hle. Thlamuan ngaih hunah min thla­muanin, chhan a ngaih hunah min chhan a ni. Hruaitu huaisen, Zo fate pa nih tling ani ang hi kan tawng leh ang em aw tih rilruah a awm a ni," a ti.