KHAWTHLIR

Mizo thuama Inthuam tur
GAD chuan notification tichhuakin, March 1 leh 2-a Chapchar Kût hman tur pualin Mizoram sorkar hnathawk zawng zawngte (Public Sector Undertakings, Boards, Bodies & Agencies tiamin)-te chu February 28, Nilainiah an pisa kainaah Mizo inthuama inthuam vek turin a hriattir.

Chapchar Kût
Lawngtlai District Chapchar Kût Organising Committee chu, nimin khan Lawngtlai DC Dr Arun T hoin DC conference hall-ah an ṭhukhawm a; Chapchar Kût hmanna tura thil ṭul hrang hrangte sawihoin, hlung taka hman a nih theih nan ruahmanna an siam.

Week khar
Kolasib College chuan nimin khan Diakkawn YMA Hall-ah College Week khârna hun an hmang a, bialtu MLA PC Zoram Sangliana khuallian a ni. MLA chuan, zirlai kalkawmte chu an zirlai ngaihthah lo tur leh taima turin a fuih a, "Mi puitling leh hlawhtling ni tur chuan lehkha zir huna min tibuai thei thil tam tak dahṭhat a pawimawh," a ti.

Lehkhabu thar
Mizoram Remote Sensing Application Centre (MIRSAC) buatsaih, 'Ṭangkai zawka vansang thiamna hman dan' tih lehkhabu chu nimin khan chief secretary Lalmalsawma'n CS conference hall-ah a tlangzarh. Lehkhabu hi MIRSAC-in Mizoram hmasawnna atana thawktute'n ṭangkai taka an hman theih nan department hrang hrang hnenah a thlawnin an pe a ni.