Mamitah damdawi man tláwm zawrhna hawng

Mamit District Hospital-a damdawi, a man tláwma zawrhna dawr, Jan Aushadi Kendra (Generic Drug Store) siam thar chu nimin khan Health & Family Welfare minister Lal Thanzara'n a hawng.

Health Minister chuan, generic damdawi hman uarna kawnga doctor-te an pawimawh ber tih sawiin, "Mipui leh damlote'n doctor-ah rinna an nghat nasa a, doctor berte'n an chawh lêm loh chuan damlo tan damdawi hriat leh lei ngaihna a awm lo. Chuvangin, doctor-te pawhin damlo dinhmun ngaituahin, a bik takin mi harsa zawkte chu damdawi man tláwm­te chawh turin kan ngen nawn che u a ni," a ti.

Lal Thanzara chuan, Mamit District Hospital, khum 100 awmna tura tihlenna tur project chu North Eastern Council-in a pawm tawh thu sawiin, "Soil testing-te tih hnuin he project hi thehluh leh a ni dawn," a ti a; project atan sum hmuh ngei a beisei thu a sawi.

Jan Aushadi Kendra hi Mamita hawn thar nen hian Mizoram pariat a awm tawh a, Mamit bakah Aizawl leh Lung­leiah a awm a ni.

Sorkar thuchhuah tarlan danin, Jan Aushadi Kendra-a damdawi zawrh­te chu damdawi siamtu, sorkar enkawl company-te inzawmkhawm Bureau of Pharma PSUs of India (BPPI) buaipui vek a ni.