Hawla leh Zorama-te'n an theihna an hmang zo vek tawh - BJP President

BJP, Mizoram Pradesh president Prof. JV Hluna chuan, "Congress president Pu Lal Thanhawla leh MNF president Pu Zoramthanga ten an theihna an hmang zo vek tawh a, Mizoram tana thil ṭha tur hriat an nei tawh lo a ni," a ti.

Nimina BJP pisaa inkhawmah thu sawiin Prof. JV Hluna chuan, India ramah tualṭo party-te an awngrawp telh telh nia sawiin, an tan din­chhuahna tura innghahna an nei tawh lo niin a sawi.

BJP chu Mizoramah nasa takin a ṭhang mek nia sawiin, "Congress-in dâwt hmanga min puh ṭhinnate chu a thlâwn mai a ni tawh," a ti.

BJP president chuan, "Mizorama Congress an lo chhuah tirh khan mipui­in nasa taka chirhthehin, 'vai pawl' tiin kan deusawh ṭhin a, Congress kha kan hmu dik lo a ni. Chutiang bawkin BJP pawh tunah hian nasa taka thu dik lo hmanga deusawh kan ni," a ti a; chutiang karah chuan BJP-in Mizorama sor­karna a chan hnuah chuan BJP deuhsawhnate chu a reh tur thu a sawi.

MNF chungchangah JV Hluna chuan, "Tunlaiin MNF party hruaitu ṭhenkhat chuan BJP nena thawkho tur anga mipui hmaa sawi an awm ṭhin a, hei hi thu dik lo a ni," a ti as MNF president Zoramthanga'n NEDA inhmuh khawmnaah NEDA convener Hemanta Biswas Sharma a rûkin biak a tum a, mahse, Hemanta Biaswas chuan a fála thil tih a rem loh thu a hrilh niin a sawi bawk.