Minister-in MUP conference hmanpui

Minister Vanlalawmpuii Chawngthu chuan February 22, Ningani khan Biate-a Zialung Hall-ah MUP, Biate area conference a hmanpui a, nimin khan Mualcheng community hall-ah MUP East Lungdar area conference a hmanpui bawk.

Vanlalawmpuii Chawngthu chuan, ram leh hnam changkang apiangin aia upate an zah thiam tih sawiin, "Pathian nung ring lo zawkte pawhin aia upate an zaha an duatthiam chuan, keini Pathian nung betute chuan upate kan zahin kan duat tur a ni. Tar chhia, tar rim nam, tar ã tih ṭawngkamte hi i hmang fo lo ang u," a ti.

Upate duat a, uluk zawka enkawl turin ṭhangthar zawkte sawmin Vanlalawmpuii chuan, "Kum upate vanga tun hun hi thleng kan ni a, aia upate zahna kawngah inel thar leh ang u," a ti a; upate chu an hriselna ngai pawimawh tur leh ram leh hnam tan an hlu reng a ni tih hre turin a chah.

MUP Biate area-ah hian Biate, Sialhawk, Tlangpui, Tlangmawi leh Riangtlei unit-te awmin, member 695 an awm a; MUP East Lungdar area-ah East Lungdar, Léng, Sailulak leh Mualcheng unit-te awmin, member 820 an awm a ni.