Bru hruai kîr dan tur ngaihtuahin Tripura refugee camp-ah inkawm khawm

Ministry of Home Affairs (MHA)-a dviser MK Singla leh Home additional secretary Lalbiakzama hoin, February 23, 2018 khan Mamit, Lunglei leh Kolasib DC te, North Tripura DC te, Mizorama YMA hruaitute leh Mizoram Bru Displaced People Forum ( MBDPF) hruaitute'n Tripura refugee camp-a Bru-te Mizorama an kîr ngei theihna turin refugee camp hrang hrangah inkawmhona an buatsaih.

Camp hrang hrang an tlawhnaah sorkar hotute chuan, Mizorama an let huna an awm dan tur leh enkawlna leh chhawmdawlna an dawn turte an hrilhfiah a; kir duhte'n hming an pek theih nan offocer-te'n an awm chilh zui a ni.

Bru enfiahnaah hian Mizoram aṭangin Home additional secretary Lalbiakzama, Lunglei DC Lalzarmawii, Mamit DC Lalbiaksangi, Kolasib DC R Zarzosanga te, district pathuma SP te, Central YMA assistant secretary Peter Chhakchhuak leh Mamit sub-hqrs. YMA president Zatluanga Sailo te bakah, refugee camp-a awm ṭhin Mamit district-a lêt tawh ṭhenkhatte leh mi pawimawh dangte nen mi 61 an ni.

MHA aṭangin adviser Mahesh Kumar Singla a kal a; North Tripura District headquarters, Dharmanagar aṭangin DC Sharabindhu Choudhury leh officer dangte an kal bawk.

Sorkar thuchhuah tarlan danin, Tripura refugee camp-a Bru awm mekte hi Mizoram district pathum - Mamit, Kolasib leh Lunglei district chhunga khaw hrang hranga lak kîr tura ruahman a; Bru lo kîrte'n sorkar laipui aṭanga ṭanpuina an dawn tur angte ruahman a ni tawh.

Mizorama lêt Bru chhungkuate hian sorkar laipui aṭangin in sak ṭanpuina Rs. 1,30,000 leh suma puihna (financial assistance) kum tin Rs. 5,000 kum hnih chhung an dawng dawn a; ration buhfai a thlawnin kum hnih chhung an dawng bawk dawn a ni.

Bru raltlante hi kum 2016 khan Mizoram mi leh sa dik tak an nih leh nih loh tichiang turin camp paruk - Kaskau, Khakchangpara,

Hamsapara, Asapara, Naisingpara, Haza­che­rra-ahte enfiah a ni tawh a, identifica­tion tih tawh chhungkua, Mizorama lêt duh ngei turte chu re-identification tih leh tur a ni a, chumia a kîr leh duh tak tak turte chu Mizorama hruai haw an ni ang.

Mizorama Bru lo kirte tan hian an awmna tur village council-te chuan in hmun leh huan thlai an siamna tur ram an pe dawn a, sorkar ṭanpuina hrang hrang, job card leh ration card-te siamsak an nih dawn bakah, sorkar ṭanpuina an dawn theihna turin a theih ang anga NLUP pawh ngaihtuahsak tum a ni.

Bru lo kirte hi Mamit district-a khaw 48, Kolasib district-a khaw 10 leh Lunglei dis­trict khaw paliah dah tura ruahman siam a ni.