Tuitun luia nungcha hraitute man an ni

Kawnpui khawtlang hruaitute chuan Febuary 21, 2018 khan Kawnpui, Mualvûm, Bualpui leh Thingdawl mipuiin an tlan mek Tuitun luia túr hmanga sangha mantu mi pathum an man a, police hnenah hlanin, magistrate thu angin Kolasib District Jail-ah dah an ni.

Thu dawn danin, Tuitun luiah mi pathumin sangha man nan tûr an phul a, ram kalte'n luia sangha leh nungcha dang thi an hmuh avangin in lama awmte an hriattir a, khawtlang hruaitute Tuitun luiah kal nghalin, mi pathumte chu an man a ni.

Heng mi pathum, Mal­sawm­tluanga s/o Than­pauva (L), Lalmuan­puia s/o Lal­ramzauva, Zo­than­tluanga s/o Chhuanvawra (L), Sihphir khua vek nia insawite hian bleaching powder chiah an hmang niin an insawi a; mahse, luiah hian khawnvartui rim a nam hle niin an sawi. Hei vang hian lui tui chu enfiah tura thawn a ni.

Kawnpui Police Station-ah FIR thehluh a ni a, mi pathumte chu police-te'n la zuiin, Kolasib District Court-ah an hruai a, Court thu angin District Jail-ah dah an ni.

Kawnpui Joint V/C, Joint YMA, Joint MHIP leh MUP-te chuan thu­chhuah inṭâwm an siam a; Tuitun luia nungchate an hrai chu an dem thu an tarlang a, "Tun hnuah kan tui tlan lai tûr leh thil dang hmanga min tihbawlhhlawhsak tawh lo turin Zoram mipui kan ngen a, ti lui an awm a, man emaw, hriat chhuah emaw an awm chuan an chungah eng pawh thleng se anmahni mawh a ni ang," an ti.