March 6-9 ah NLUP Kûtpui

NLUP Implementing Board (NIB) hotute chuan, Inrinni tlai khan AIjal Club-ah March 6-9, 2018 chhunga NLUP Kûtpui buatsaih tur chungchang thuthar thehdarhtute an hrilhfiah a, IPR minister Lal Thanzara'n a hmanpui

NIB hotute sawi danin, NLUP hi January 14, 2011-ah hawn a ni a, Sepetember 2011-ah sem ṭan a ni. Chhungkaw 1,30,000 hnenah NLUP ṭanpuina sem a ni tawh a, chhungkaw 16,000 hnenah sem leh tura hmalak mek a ni.

NLUP hawn ni, January 14-ah kum tin Kuthna­thawktute Ni hman a ni ṭhin a, kuminah chuan NLUP Kûtpui hman tum a nih avangin Kuthnathawk­tute Ni hman a ni lo.

NLUP Kûtpui hi March 6-9 chhungin Assembly Annexe-ah hman tur a ni a, March 6-ah Vanapa Hall-ah Chief Minister-in a hawng ang. Kûtah hian line department hrang hrangte'n an hma­lakna an phochhuah bakah, NLUP dawngtu hlawhtling leh entawntlakte mipui hmuh theiha pho lan a ni dawn a. NLUP hnuaia thar chhuahte chu bazar aia tlâwma zawrh a ni ang.

NLUP Kûtpui pual hian photo exhibition leh NLUP dawngtu hlawh­tling­te chanchin video documentary tihchhuah ṭhin tum a ni a; NLUP hian Mizoram pum a tuam chhuak tawh a, a hlawh­tlinna hmuh tur tam tak a awm niin NIB hotute chuan an sawi.