Sunday school-ah hming ziak 4,33,793

February 20, 2018 kha MSSU Day a ni a, he ni puala Mizo Sunday School Union (MSSU)-in sunday school dinhmun a tarlan danin, MSSU hnuai­ah zirlai, zirtirtu leh hotute (thawktu dang) nen, hming ziak zawng zawng 4,33,793 an awm mek.

Mizoramah hian kum 1898-ah sunday school neih ṭan a ni a, kumin hi Mizoramah sunday school a awm kum 120-na a ni.

August 31, 1897-a lo thleng Rev. DE Jones (Zosaphluia) chuan a pian champha vawi 28-na, February 15, 1898, Thawhlehnia hawn turin Hrianghmun mual, tuna Synod Bookroom leh Synod Press inkar (Zosaphluia building awmna)-ah sikul atan râp-in a sa a; chutah chuan February 20, 1898-ah sunday school a neihpui ṭan a ni. February 20 hi Mizoram Synod chuan Mizorama sunday school din ṭan ni-ah a pawm.

Tuna MSSU din­hmun tlangpui chu - sunday school 963 a awm a, chutah chuan zir­tirtu 47,116 leh zirtu mi 3,82,183 an awm a, hotute 4,494 an awm bawk a; chung zawng zawng belhkhawm chu 4,33,793 a ni.