KHAWTHLIR

Thisen pe
Tuipuiral Zirlai Pawl chuan an din champha lawm nan Inrinni khan Aizawl Civil Hospital-ah thisen unit 71 an pe a, a petute mipa 64 leh hmeichhia pasarih an ni. Mission Vengthlang Branch KṬP pawhin Inrinni khan an kohhran hall-ah blood donation camp an nei a, Synod Hospital tan mipa 37 leh hmeichhia pakuate'n thisen unit 46 an pe.

Aizawl-Delhi thlawhtheihna
Jet Airways chuan vawiin aṭang hian Aizawl leh New Delhi inkarah chawlh lailawk awm loin thlawhtheihna lian, Boeing 737 a thlawhtir ṭan dawn nia thu dawn a ni. Aizawl leh New Delhi inkara Jet Airways-in thlawhtheihna a thlawhtir mek chu Guwahati-ah darkar khat vel a châwl ṭhin a, vawiin aṭang chuan a thlawk tlang ṭhin tawh dawn a, darkar thum chhung vel a thang ang.

Award dawng
Pachhunga University College-a assistant professor Dr Vanlalthlana chuan, tun hnai khan International Business Council aṭangin Bharat Vidya Ratan Award a dawng. Dr Vanlalthlana hian investor awareness, investor rights leh pawisa dah punna lem chhui chhuaha dodal kawngah hma a la ṭhin a ni. Tun hnaiah Economic Offenses Wing nen Mizorama lo lut mek, chiahpuam chi khat an chhui chhuak a ni.

Lok Adalat
Lawngtlai District Legal Services Authority chuan Inrinni khan Lawngtlai District Court-ah Lok Adalat an buatsaih a, thubuai lut 254 ziga 86 an chingfel. Thubuai chinfelte hi bank loan chungchang vek a ni.

Kawng enfiah
Champhai addl. DC Lalsangpuii Hmar chuan tun hnai khan Champhai MJA Press Club bul kawngpui zauh dan tur a hmunah kalin a enfiah. Lalsangpuii chuan, kawng a zim avangin thlang lamah retaining wall siama zauh ni se a duh thu a sawi.

Kohhran mite ngen
Lunglei District Level Fire Prevention Committee member secretary C Lalthankima'n an district chhung mipuite hnena ram tikâng lo tura thuchah a tihchhuah chu, Baptist Church of Mizoram chuan an tualchhung kohhran tina puan turin an thawn darh. Baptist kohhran chuan an kohhran mite chu ram tikâng lo tur leh March 15, 2018 ral hmaa lo hâl turin an ngen nghal a ni.