BADP hnuaia sum hmuh tur zat la chiang lo
Border Area Development Programme (BADP) hmanga Mizorama hna thawhna atan nodal department, Rural Development (RD) chuan tun hnaiah kum tin cheng nuai 4,000 - 5,000 vel an dawng ṭhin a, kum 2017-18 chhunga dawn tur zat chiah erawh hriat chian theih a la ni lo. RD department hotute chuan, BADP hmanga hna thawhah thubuai a la awm lo niin an sawi.
RD department hotute sawi danin, BADP hnuaia kum 2017-18 chhunga Central aṭanga sum an dawn tur chu nuai 4,600 vel a nih an beisei a, eng emaw zat chu an dawng tawh a ni. Kum 2012-13 khan nuai 4,114.73, kum 2013-14 khan nuai 3,977, kum 2014-15 ah nuai 3,515.55, kum 2015-16-ah nuai 3,812 leh kum 2016-17 ah nuai 4,550 an lo dawng tawh bawk.
RD department hotute chuan, BADP hnuaia estimate siamte chu a hmuna endiktu tur thawktu an indaih loh vangin hna thawhna khuaa V/C-te'n ṭha taka an enpui a pawimawh thu an sawi a; a remchan dan anga sum hman dân siam rem a ṭul cháng a awm avangin, khaw tina tlawmngai pawlte pawhin V/C-te hnathawh dan an enpui a pawimawh thu sawiin, "Hmun hrang hranga V/C-te hnathawh hi vênpuitu awm lo se chuan sual a awm fo ang," an ti.
RD department hotute sawi danin, BADP suma hna thawh turah bithliah fel taka sawi a awm loh avangin a huam zau a; hna thawhte chu hlawm hrang hrangah ṭhen a ni.
Infrustructure lam bikah kawng laih te, retaining wall, culvert siam, kawng blacktop-te a ni tlangpui. Health sector lamah pawh a huam zau a, oxygen, infant warmer, analyser leh ICU-te thlengin ngaihtuahsak theih a ni.
Social sector lamah pawh community centre, anganwadi, old age home thlengin din theih a ni a; education lamah - sikul sak, sikul panna kawng siam, retaining wall, zirtirtute awmna tur quarters sak, zun in leh thil dang siamte pawh a tel. Sports sector lamah khelmual siam, pavillion sak, sport hmunhma siam-te a awm a; capacity building lamah pawh hmalak ṭhin a ni bawk.
RD department hnuaiah hian Mizoram pumah block 26 a awm a, block pakhatah khaw 30 velte a awm. Block pakhat chu JE pakhatin an vil ṭhin, mahse, block tinah JE an dah kim thei lo. BADP bik hian RD block 16 a huam a ni.