MNYF-in Lengpuiah beihpui an thlâk

MNF ṭhalaite chuan Inrinni khan Lengpuiah Fehchhuah Beihpui a thlak chhunzawm a; MLA pahnih Lalrinawma leh Dr K Beichhua ten thu an sawi.

MNYF president ni bawk Lalrinawma chuan, Mizoram economy a chhe tial tial nia sawiin, "NLUP a hlawhtling ti mah se, thil man a to zel a. Kan state sum cheng vaibelchhe tam tak an hmanna NLUP an party hamṭhat nana an hmang hi a dik lo a, a Pathian thu lo hle a ni," a ti a; MNF an sorkar chuan zirlai harsa zawkte tan SEDP hnuaiah student hostel din an tum thu a sawi.

Dr K Beichhua chuan, MNF party chuan engti zawng mahin zu zawrh an duh lo tih a sawi a; "Thlawhna hian engine pahnih a nei a, pakhat a chhiat pawhin pakhat hmangin a thlawk ṭhin. Congress hi Central engine leh Mizoram engine hmangin an thlawk ṭhin a, kum 2014 khan Central engine a thi tawh a, tunah hian Mizoram engine hmangin a la thlawk mek a ni. Kum­ina inthlanah an thlawh­na tui zo tur hi khawmualah nge, tuipuiah a tlak ang tih hi mipui zawhna a ni," a ti.