Electric bill dik tak pek theih nan Bill pek theih hun pawhsei a ni

Nimin khan Power & Electricity minister R Lalzirliana hoin department hotute leh páwl hrang hrang hruaitute'n electric bill chungchang an sawiho a; mipuiin bill dik tak an pek theihna atan bill pek hun chu August 31, 2021 thleng pawhsei an rél.

Ṭhutkhawmah hian Central YMA, Mizoram Upa Pawl, Mizo Hmeichhe Insuih­khawm Pawl, Mizoram Consumers Union, Mizoram Merchant Association leh Mizoram Journalist Association hruaitute an tel. Páwl aiawhte'n an ngaihdan leh ṭha an tihte an sawi hnuah meeting chuan resolution an pass a ni.

Minister R Lalzirliana chuan, kawlphetha man tihsan tur chungchangah JERC chuan public notice a siam thu sawiin, "Bill a sáng ti leh tur chuan sawiho ní-ah ṭhahnemngai taka sawi àwm tak a ni a, an hmél hmuh tur a awm leh si lo. Kawlphetha man hi Covid-19 avanga sang thut a ni lo a, nikum lamah pawh a sang tawh," a ti.

Power Minister chuan, Covid-19 avangin meter reader-te'n a hmunah reading an tih loh thu sawiin, "Covid-19 avanga inkaihhruaina a khauh êm avang leh danin a hmuna kal kher loa bill siam a lo remtih tho si avangin reading tih a ni lo. Hripui kai darhtu nih kan hlau ve tho," a ti a; a hriatpuinaa thil tih a nih avangin mawhphurh tur a awm chuan a mawh a nih thu a sawi.

Electric bill tihsan a nih hma angin September thleng a ngaiin kal se tih rawtna lut chungchangah R Lalzirliana chuan, "JERC kan be chhin tawh a, Mizoram sorkarin kan duh chuan tih theih dan a awm thu min hrilh. Mahse, kawlphetha man thar April aṭanga hman ṭan ngei a ngaih avangin, a punna Mizoram sorkarin kan pek a ngai. Sorkar tan cheng vaibelchhe tél sên a ṭul a, a ngaihna a awm lo," a ti.

PE Minister chuan, meter reader áikal la an awm nia sawi chu a ngaih thu tak thu sawiin, "Ka lo hre ngai lo a, ka ngai serious hle. Action lak tlak a ni. An damlo a nih chuan an hotute'n an aiawh tur an ruat a ni," a ti a, tun hnuah aikal la an awm tawh tur a ni lo tih a sawi.

Páwl hrang hrang aiawhte chuan, meter reader-te'n reading an lak loh chhan chu chhuanlam tlinga an ngaih loh thu te, bill complaint-in thawktute dàwr an har thu te, bill sang lutuk a awm nual thu te, vawi leh khata kawlphetha man tihpunna a sang lutuk chu ṭha lo an tih thute leh, bill complaint-na chu Covid-19 lakah a him tâwk loa an hriat thute an sawi a ni.

Meeting chuan resolution pass-in, dik taka electric bill mipuite'n an pek theih nan leh complaint hun an neih theih nan bill pek hun August 31, 2021 thleng pawhsei ni rawh se, an ti.

Hun pawhsei chhungin a duh apiang tan an electric bill complaint theih a ni dawn a, PE department sub-division-a an complaint hnua an lungawi loh chuan executive engineer-ah zualko theih a ni a, an la lungawi loh zel chuan EE chung lama mite hnenah zualko zel theih a ni.

Consumer aṭanga complaint lutte chu thawktute'n uluk taka chhût ṭhain, mipuiin bill dik tak an pek theih dan tur an ngaihtuah dawn a; bill dik lo tih hriat sa, sang leh lutukte chu siamṭhat vek tum a ni.