Photo Art Exhibition & Competition
Mizoram School of Photography (MSP) leh Photography Club of Mizoram-te chuan nimin khan World Photography Day kum 182-na pualin MSP, Sikulpuikawnah thlalak phochhuahna leh inelna, Digital Photo Art Exhibition & Competition vawi ngana an buatsaih.
Intihsiakna hi AMC ward-XVIII councillor Malsawmzuala Ralte-in Photography Club of Mizoram website www.pcom.ga ah en theih turin a hawng a ni.
Malsawmzuala Ralte chuan, tunlaiah thlalak a ṭangkai hle tih sawiin, "Mita hmuh mai theih, ṭawngkam tel miah loa rilrua thu sawi nghal thei, thil ṭangkai tak a ni a, thusawi ai mahin mi thinlungah thu a sawi nasa thei zawk a, a nghawng thui thei zawk a ni," a ti a; thla la thiam leh a tui mite chu ṭan la zel tur leh hmasawn zel tum turin duhsakna a hlan.
MSP director Malsawmtluanga tarlan danin, intihsiakna hi hlawm thum - Open Colour, Open Monochrome leh Still Life-ahte ṭhen a ni a; Open Colour-ah thlalak 146, Open Monochrome-ah thlalak 93 leh Still Life-ah thlalak 40 lutin, a vaiin thlalak 279 a lut a ni.
Malsawmtluanga chuan, MSP aṭangin mi 200 chuangin course hrang hrang an zir zo tawh a, mahni kea dinga eizawnna bul ṭan te, sorkara lutte leh India ram chhung leh páwn company-a lutte an awm ve nual tawh tih a sawi.