Sawisel tur dap rengah Congress puh

MNF party chuan thuchhuah siamin MPCC thuchhuah an chháng lêt a; Congress party chu sorkar tihsual palh châng rengah leh sawisel tur dap rengah an puh.

August 18, 2021-a MPCC thuchhuahah, sorkarin notification a lo tihchhuah tawh zâwm loin, local/village task force member leh volunteer ṭhenkhat, Covid-19 vei, ZMC-a enkawlte'n a thlàwna enkawlna an dawn loh thu leh pawisa pek ngaite an pek thu an tarlang a ni. MPCC thuchhuah hi MNF party chuan thu belhchian dâwl lo niin an tarlang.

MNF chuan, sorkar notification No.D-33011/21/2019-HFW(nCOV)/Vol.II/36 Dated Aizawl, the 9th Sept. 2020 chu a ngaiin a la ding reng tih sawiin, Covid vei damlote Mizoramah mi sang tél sorkarin a enkawl mek thu an tarlang a, "Thawktute tan pahnih/khat lo tihsual palh zeuh chu khawvel a nih miau avangin a awm lo thei lo. Chu chu lo châng ràna an tihdan pangngai, sawisel tur dap zawng ringawta thu an kalpui ṭhin hi sim ve deuh tawh turin kan duh a ni," an ti.

LTF chairman pakhat Ramzauva, Tuikual chu ZMC-ah dah luh a ni tih sawiin MNF chuan, "Amah a lo insawi lo nge, bill a lo pe a, Medical Superintendent-in ko kir lehin an pe lêt leh a ni," an ti a; mi dangte pawh tihfel leh ngai an awm nual tih hriat a nih thu an sawi.