Covid-19 vei percent san lamah Mizoram 6-na

Nimin zinga Covid-19 dinhmun angin, Mizo­rama hripui vei hmuh chhuah tawh 50,437 chu kum 2011 chhiarpuia mihring awm zat 10,97,206 aṭangin 4.60% a ni a, India rama state zingah mihring zat aṭanga tehin Covid-19 vei hmuh chhuah tawh tam lamah parukna a ni. Covid-19 positive hmuh tawh aṭanga enkawl mek tam berna state a ni zui zel bawk.

Nimina sorkar laipuiin Covid-19 dinhmun a tarlana a lan danin, India rama state zingah mihring zat aṭanga teha hripui vei tamna ber chu Goa a ni a, mihring 14,58,545 awmin, hripui vei 1,72,763 hmuh a ni tawh a, chu chu 11.84% a ni. Union territory-te nena khaikhawmin, Lakshadweep chu hripui vei hmuh tawh percentage sanna ber a ni thung a, 15.97% a tling.

Mizoram aia hripui vei hmuh chhuah tawh tamna state dangte chu - Kerala 11.21% (mi 37,45,457), Maharashtra 5.70% (mi 64,06,345), Karnataka 4.80% (mi 29,33,192) leh Sikkim 4.75% (mi 28,981) a ni.

UT zingah mihring awm zat aṭanga teha hripui vei hmuh zat Mizoram aia tamna panga a awm bawk a; chu'ngte chu - Lakshadweep bakah, Puducherry 9.82% (mi 1,22,542), Delhi 8.56% (mi 14,37,192), Ladakh 7.46% (mi 20,472) leh Chandigarh 5.88% (mi 62,045)-te a ni.

Covid-19 positive hmuh chhuah tawh zat tam lamah Mizoram chu state 28 zingah 26-na a ni a, Nagaland (mi 29,331) leh Sikkim (mi 28,981)-te chu Mizoram aia positive case hniamna state a ni. UT zingah Delhi (14,37,192), Jammu & Kashmir (3,23,682), Pudu­cherry (1,22,542) leh Chan­digarh (62,045)-te chu Mizoram aia tamna a ni bawk.

August 18, Nilaini bika hripui vei hmuh chhuah thar tam lamah Mizoram chu India rama state leh UT 36 zingah pakuana a ni a, Mizoram aia hmuh thar tamna state pariat a awm. Hmarchhak state bikah, Assam tih lohah Mizoram chu hripui vei hmuh thar tam berna a ni.

Covid-19 vei enkawl mek (active case) tam lamah Mizoram chu India ramah pakuana a ni bawk a, Mizoram aia enkawl mek tamna state pariat awmin, a bak state 19 leh UT pariat chu Mizoram aia active case tlemna vek a ni tawh.

Hripui vei hmuh chhuah tawh aṭanga enkawl mek zat percentage-ah Mizoram chu 16.32% niin, India ramah a sang fál hle a, Mizoram dawta sang ber Sikkim chu 6.41% a ni.

Covid-19 vei thi zat leh thi zat percen­tage-ah erawh chuan Mizoram chu state zingah thi tlemna ber a ni thung a, thi zat percentage chu 0.37% a ni. UT zingah pawh Mizoram aia thi percentage hniamna pakhat Dadra & Nagar Haveli and Daman & Diu (0.04%) chiah a awm.