Assembly seat ruak puan dan sawifiah

Mizoram Legislative Assembly secretary H Lalrinawma chuan nimin khan thuchhuah siamin, Assembly constituency ruak a awm avanga notification tihchhuah a nih chhan a sawifiah.

Assembly Secretary tarlan danin, sorkar dan ding laiin a sawi angin, Assembly member hmun ruak a awm chuan Assembly Secretary-in official notification siamin hmun ruak a awm thu a puang a; a copy chu Governor hnenah leh Election Commission of India-ah pek tur tih a ni.

Tuirial bialtu MLA Andrew H Thangliana August 17, 2021-a a thih avangin Tuirial Assembly constituency (ST) chu seat ruak a nih thu Assembly Secretariat-in August 18, 2021 khan a tichhuak a; notification copy chu Governor-ah leh ECI-ah thawn nghal a ni.

MLA Andrew H Thangliana thih tûk maia Assembly Secretary-in bial ruak a nih thu a tihchhuah chu social media lamah demna leh puang hma lutuka ngaihna a awm a; hemi chungchangah hian constituency seat ruak a awmin, a hma thei ang bera notification tihchhuah chu danin a sawi anga kalpui ṭhin a nih thu a tarlang.

Assembly Secretary tarlan danin, MLA ni lai Chawngtinthanga chu September 16, 2012-ah a thi a, a bial, Chalfilh chu seat ruak a nih thu September 17, 2012-ah tihchhuah a ni.

MLA B Lalthlengliana chu April 15, 2013-ah a thi a, a bial East Tuipui chu seat ruak a nih thu April 15-ah vek tihchhuah a ni.

Lunglei South bialtu MLA S Laldingliana chu November 3, 2018-ah a thi a, a bial chu seat ruak a ni thu November 5, 2018-ah tihchhuah a ni bawk.