KHAWTHLIR

Photography Day
Information & Public Relation department leh Mizo Photographer Society chuan nimin khan IPR Auditorium-ah World Photography Day vawi 182-na an hmang a, IPR director Lallianpuii'n a hmanpui. Lallianpuii chuan, thla latute chu thlalak leh ro tling a awm zel theih nan an thiamnate tisang zel turin a chah. Inkhawmah hian World Photography Day puala Facebook kaltlanga August 9-15 chhunga photo competition an buatsaih result puan a ni.

Thisen pe
KṬP, Ramhlun Vengchhak Branch chuan nimin khan an kohhran hall-ah Synod Hospital tan thisen unit 25 an pe a, petute mipa 18 leh hmeichhia pasarih an ni. Salvation Army Youth pawhin Aizawl Civil Hospital blood bank-ah thisen unit 31 an pe a, petute mipa 23 leh hmeichhia pariat an ni a; mimal a thlawna thisen pe mi pakua an awm bawk.

Meizial man
Serchhipa hmunpui nei Assam Rifles leh Champhaia Customs department chuan nimin khan Ruantlang huam chhung leh Kelkang-Khuangleng kawngah ram dang meizial báwmpui 502 an man a, a neitua puh mi pathum an man bawk. Foreign cigarette an man chu Rs. 6,52,60,000 mana chhût a ni.

Kawng dung enfiah
Siaha DC mawhphurhna la mektu B Lalchhawntluanga kaihhruaiin August 18, Nilaini khan DC pisa, PWD, Police, LAD, MADC Road Transport department, MADC, MTP(H) leh Joint VC-te'n Siaha khawpuia kawngpui an fang a, kawngpui dîpdâl leh nék chêpa in sakna châkkhai leh dawr bungraw dahte an enfiah. Kawngpui dîpdâla bungraw dahtute chu an bungrua thenfai hma leh thenfai hnu thlalakte LAO, MADC hnena thawn vek turin an hriattir a ni.

Hmanrua dawng
Lunglei DC Pu Kulothungan A, hmalaknain nimin khan an district chuan Give India Foundation, Ahmedabad aṭangin N-95 mask 1936, oxygen flow meter 150, oximeter 100, three layered surgical mask 2005, digital BP instrument 50, digital thermometer 100 leh stethoscope 50 an dawng.