COVID-19: Mizoram dinhmun : Hripui vei 487 hmuh belh a ni

August 18, Nilaini khan Mizoramah Covid-19 vei mi 487 hmuh chhuah a ni a; Nilaini kha dam tawh chhuahtir tam ber ní a ni. Nimin khan hripui vei dam tawh mi 678 chhuahtir an ni a, hripui vangin mi pali an thi.

Covid-19 vei hmuh tharte chu mipa 236 leh hmeichhia 251 an ni a; ZMC laboratory-a hmuh chhuah 52, TrueNAT-PCR hmanga hmuh 17 leh RAT hmanga hmuh chhuah 418 an ni. Fluorescent Immunoassay (FIA) hmanga sample pahnih endikte an negative thung.

Hripui vei hmuh thar mi 487-te chu symptom nei 306 leh nei lo 181 an ni a; tualchhunga kái 496 leh tun hnaia state páwn aṭanga rawn lut pakhat niin, tualchhunga kái zingah kàina chin hriat loh mi 273 an awm.

IDSP record angin, Mizoramah Covid-19 vei 50,437 hmuh chhuah a ni tawh a, mipa 26,102 leh hmeichhia 24,335 an ni. Nimin tlai dar 5 thleng khan mi 42,697 (84.65%) chhuahtir an ni tawh a, mi 190 (0.38%) thi tawhin, enkawl mek mi 7,550 (14.97%) an awm.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 12,201 hmuh chhuah a ni tawh a, TrueNAT-PCR hmangin 2,983, RAT hmangin 35,237, FIA hmangin 35 leh Guwahati-ah pakhat hmuh chhuah a ni tawh.

August 18, 2021 thlengin Mizoramah swab sample 7,65,047 endik a ni tawh a, chu'ng aṭanga Covid-19 vei hmuh tawh zat 50,437 chu 6.59% a ni. Hripui vei hmuh tawh zinga mi 46,159 chu Mizoram chhunga kái chhâwng an ni a, mi 4,278 chu Mizoram páwn aṭanga an rawn luh hnua hmuh chhuah an ni.

August 18, Nilainia sample endik dan chu - ZMC laboratory-ah Aizawl district-a mi 1,210, TrueNAT hmangin district pariatah 341, RAT hmangin district 11-ah 9,622 leh FIA hmangin Aizawlah pahnih a ni a, a vaiin sample 11,175 a ni. Sample endik aṭanga hripui vei hmuh chhuah 487 chu 4.29% a ni a; ZMC-ah 4.29%, TrueNAT-ah 4.98%, RAT-ah 4.34% leh FIA-ah 0.00% a ni.

District hrang hranga hripui vei hmuh chhuah dan chu - Aizawlah mi 263, Kolasib-ah 65, Lawngtlaiah 59, Lungleiah 32, Serchhipah 22, Siahaah 20, Champhaiah 14, Hnahthialah pasarih leh Mamitah panga an ni. ZMC laboratory-a hmuh chhuah mi 52 zingah naupang kum tling lo 15 an awm laiin, kum 60 chung lam pakhat chiah a awm a; TrueNAT hmanga hmuh chhuah mi 17 zingah pawh naupang kum tling lo pariat an awm laiin, kum 60 chung lam an awm lo.

Hripui vei hmuh chhuah thar mi 487 zingah naupang kum tling lo 120 chuang telin, an zingah symptom nei 70 vel an awm a, nausén kum khat tling lo paruk an awm. Kum 60 chung lam 35 vel telin, an zinga 20 chuangin symptom an nei a, a upa ber chu kum 84 mi a ni. August thlaa ni 18 chhungin Mizoramah Covid-19 vei mi 11,513 hmuh chhuah a ni tawh a, chawhrualin ni tin mi 639.61 hmuh chhuah an awm ang a ni. Mizorama Covid-19 vei hmuh tawh zat 50,437 chu kum 2011 chhiarpui angin, Mizorama mi 1,000 zelah hripui vei mi 45 an awm ang a ni.

Nimin khan tlai dar 5 thlengin hripui laka fihlim tawh mi 678 chhuahtir an ni a; Aizawl district-ah mi 479, Kolasib district-ah 140, Lawngtlai district-ah 22, Siaha leh Mamit district-ah 18 ve ve leh Saitual district-ah pakhat an chhuak. August 18, Nilaini khan mi 1,338 an chhuak a, chhuak an tam ber ní a ni.