RD Minister hoin DRDA hnathawh thlirho

All Mizoram DRDA Employees Association (AMDEA) hruaitute chuan nimin khan Rural Development minister Lalruatkima chu a pisaah an kâwm a; DRDA hnathawh, hlawhtlinna leh hmachhawpte an thlirho.

Geo tagging-ah Mizoram chu India ram pumah pakhatna a nih thu leh tehna hrang hrangah pawh a sang ber pawl a nih thu sawiin Minister chuan, "Shyama Prasad Mukherji Rurban Mission (SPMRM)-ah pawh Mizoram chu India ram pumpuia Critical Gap Fund hmang ṭha ber dawttu a ni a, hei vang hian Ministry of RD aṭanga sum pek chhuah kawngah harsatna a awm lo," a ti. RD department-in hna a thawh ṭhat theih chhan lian ber pakhat chu khaw tina VC-te nen thawhhona ṭha tak a awm vang a nih thu a sawi bawk.

AMDEA hruaitute chuan, Mizoram sorkar hnuaia kum 2008 hma lama DRDA-a thawk tura lakte RD department hnuaia seng luh leh dah ngheh an nih avangin RD Minister chunga an lawm thu an sawi.