Hripui vanga thi mi 4 awm belh

Nimin khan Covid-19 vei enkawl lai mi pali an thi. Sorkar chhinchhiah angin, nimin tlai dar 5 thlenga hripui vanga Mizorama thi chu mi 190 an ni tawh a; August thla bikah mi 42 an thi tawh.

Covid-19 vei enkawl lai Thangtea (94) f/o Lalngaihzuala, Vairengte Tlangnuam chu Nilaini zanlai pelh hnu, August 19 dar 12:05 a.m. khan State Referral Hospital-ah a thi a, nimin chhun khan Hmarveng Branch YMA Hall-ah vui a ni. Covid-19 vei a ni tih August 3 khan hmuh chhuah a ni a, SRH-ah dah luh nghal a ni.

Ralthanpuii (37) h/o Ramthanmawia, Zamuang pawh nimin zing dar 2 khan Covid-19 vangin SRH-ZMC-ah a thi a, nimin tlai khan vui a ni. Covid-19 positive a ni tih August 8 khan hmuh chhuah a ni a, SRH-ah dah luh nghal a nih thu sorkar thuchhuakin a tarlang. Zamuang khawtlang hruaitute chuan, Ralthanpuii hi thisen vár tlachham leh natna dang nei sa a nih thu an sawi.

Nimin zing vek dar 7:30 khan TC Lalremmawii (35) w/o Malsawmtluanga, Lawngtlai Council Veng chu hripui vangin SRH-ZMC-ah a thi a, vawiinah vui a ni ang. Covid-19 vei a ni tih August 4-ah hmuh chhuah a ni a, August 9 aṭangin SRH-ah enkawl a ni. Amah hi thaw-hah nei sa a nih thu Lawngtlaia journalist-te chuan an sawi.

Nimin chawhnu dar 1:37 khan hripui vei enkawl lai Dongaihliana (52), Chaltlang chu SRH-ZMC-ah a thi a, hripui vanga Mizorama thi 190-na a ni. Covid-19 positive a ni tih August 12 khan hmuh chhuah a ni a, SRH-ah enkawl nghal a ni.